ملک کے بیشتر علاقوں میں بارش اور ژالہ باری کا سلسلہ جاری ہے، مظفرآباد کے نواحی علاقے بلگراں میں بادل پھٹنے (کلاؤڈ برسٹ) کے باعث ایک خاتون جاں بحق جبکہ متعدد افراد لاپتہ ہوگئے۔ ہری پور اور نوشہرہ میں میں دیوار گرنے کے واقعے میں بچے سمیت دو افراد جاں بحق ہوئے۔ شانگلہ میں آسمانی بجلی گرنے سے ایک شخص جاں بحق ہوا۔ مختلف حادثات میں 50 کے قریب افراد زخمی ہوئے جنھیں طبی امداد کے لیے باچاخان میڈیکل کمپلیکس لایا گیا۔ آئندہ 24 گھنٹوں میں پنجاب اور کے پی میں مزید بارش کی پیش گوئی کی گئی ہے۔ بلوچستان کے ضلع قلعہ عبداللہ، پشین، قلعہ سیف اللہ، لورالائی میں بھی آندھی اور مٹی کا طوفان آیا۔

ملک کے بیشتر شہروں میں شدید گرمی کے بعد بارشوں اور ژالہ باری کا سلسلہ جاری ہے، بعض علاقوں میں بادل پھٹنے، آندھی، طوفان اور لینڈ سلائیڈنگ کے باعث معمولاتِ زندگی متاثر ہو رہے ہیں۔

مظفرآباد میں کلاؤڈ برسٹ، خاتون جاں بحق، متعدد افراد لاپتہ

مظفرآباد کے نواحی علاقے بلگراں میں بادل پھٹنے (کلاؤڈ برسٹ) کے باعث ایک خاتون جاں بحق جبکہ متعدد افراد لاپتہ ہو گئے۔ ایس ڈی ایم اے کے مطابق کلاؤڈ برسٹ مگری مالی اور لیسوا کے علاقوں میں ہوا۔

واقعے کے بعد ریسکیو ٹیموں نے فوری کارروائی کرتے ہوئے لاپتہ خاتون کی لاش ملبے سے نکال لی، جب کہ دیگر لاپتہ افراد کی تلاش کا عمل جاری ہے۔

ڈائریکٹر ایس ڈی ایم اے کے مطابق کلاؤڈ برسٹ کے باعث چار مکانات اور ایک مسجد کو شدید نقصان پہنچا ہے۔ کوئیک رسپانس ٹیمیں جائے وقوعہ پر پہنچ چکی ہیں اور امدادی آپریشن جاری ہے۔

کوٹلی آزاد کشمیر میں آندھی اور بارش کے مختلف حادثات میں متعدد شہری زخمی ہو گئے۔ شدید آندھی کے باعث عمارتوں کے دروازے بھی ٹوٹ گئے۔

کے پی میں مختلف حادثات میں بچے سمیت 3 افراد جاں بحق

خیبرپختونخوا کے مختلف اضلاع بشمول پشاور، سوات، مانسہرہ، شانگلہ، باڑہ، لنڈی کوتل، بالاکوٹ اور وادیٔ کاغان میں موسلا دھار بارش اور ژالہ باری سے گرمی کا زور ٹوٹ گیا تاہم کچھ علاقوں میں تیز اندھی اور بارش نے تباہی مچا دی۔

بارش کے باعث مکان کی دیوار گرنے سے بچہ جاں بحق ہو گیا جبکہ حادثے میں دو بچے زخمی ہوئے۔ جاں بحق بچے کی شناخت شوال کے نام سے ہوئی، جاں بحق اور زخمی بچوں کو اسپتال منتقل کر دیا گیا۔

ہری پور میں ایک اور واقعے میں تیزرفتار وین تیز آندھی کے باعث بے قابو ہو کر کھائی میں گر گئی۔ حادثے میں ڈرائیور زخمی ہو گیا، مختلف مقامات پر بجلی کے پول اور درخت گر گئے اور بجلی کی فراہمی معطل ہے۔

ہری پور میں ایک اور مقام پر طوفان کے باعث گھروں کی چھتیں دیواریں گرنے سے لاکھوں کا نقصان ہوا، سری گاؤں میں طوفان کے باعث گھر کی دیوار گرنے سے رہائشی یاسر نامی شخص کی 23 بکریاں دب گئیں، 20 بکریاں ہلاک جبکہ 3 شدید زخمی ہیں۔

تحصیل غازی کے علاقہ درہ موہٹ میں بھی طوفان سے 7 کشتیاں الٹ گئیں، کشتیوں کے انجن پانی میں ڈوب گئے، شدید طوفانی ہواؤں کی وجہ سے پانی پر کشتیاں توازن برقرار نہ رکھ سکیں۔

باچاخان میڈیکل کمپلیکس میں 58 زخمی لائے گئے

ترجمان باچاخان میڈیکل کمپلیکس کے مطابق باچاخان میڈیکل کمپلیکس میں 58 زخمی لائے گئے ہیں، تیز آندھی، طوفان اور بارش کے باعث زخمی ہونے والوں کو طبی امداد مہیا کی جارہی ہیں۔

ترجمان باچاخان میڈیکل کمپلیکس کے مطابق زخمیوں کو مختلف نوعیت کی چوٹیں آئیں، تمام زخمیوں کا علاج جاری ہے، اس وقت سرجیکل ایمرجنسی میں 25 زخمی زیر علاج ہیں، 33 زخمیوں کو ابتدائی طبی امداد کے بعد فارغ کردیا گیا۔

شانگلہ کی تحصیل بشام شنگ میں گھر پر آسمانی بجلی گرنے سے ایک شخص جاں بحق اور 3 افراد زخمی ہوئے۔ پشاور کے علاقے متنی میں بھی ہوٹل کی چھت گرنے سے تین افراد زخمی ہوئے۔

تیز آندھی سے پشاور اسپورٹس کمپلیکس کی گیلری کی چھت اڑ کر باہر سڑک پر جا گری ، دوسری بار ایسا ہوا ہے کہ آندھی سے اسپورٹس کمپلیکس کی چھت گرگئی۔

سوات کے علاقوں مینگورہ، مالم جبہ اور کالام میں تیز ہواؤں کے ساتھ بارش جبکہ شانگلہ کے الپوری اور گردونواح میں شدید ژالہ باری ریکارڈ کی گئی۔

نوشہرہ میں طوفان کے باعث مختلف مقامات پر درخت اور دیواریں گرگئیں۔ حادثات میں ایک شخص جاں بحق جبکہ دو زخمی ہو گئے۔ مدینہ کالونی میں دیوار گرنے سے ضعیف العمر شخص زخمی ہوا۔

تیز طوفان کے باعث اکوڑہ خٹک سمیت جگہ جگہ درخت اکھڑ گئے، طوفان کے باعث بعض مقامات پر گھروں کو جزوی نقصان پہنچا۔

ایبٹ آباد اور گردونواح میں طوفانی بارش کے باعث موسم خوشگوار ہو گیا، تاہم ندی نالوں میں طغیانی سے مانسہرہ روڈ پر ٹریفک جام ہو گیا۔

محکمہ موسمیات کے مطابق بارشوں کا سلسلہ آئندہ چوبیس گھنٹوں تک وقفے وقفے سے جاری رہے گا۔

مری میں طوفانی بارش

ملکہ کوہسار مری میں بھی طوفانی بارش کا سلسلہ جاری ہے، جہاں کالی گھٹاؤں نے دن کو رات میں بدل دیا ہے۔ شدید بارش سے موسم سرد ہو گیا ہے جبکہ بجلی کا نظام متاثر ہوا ہے۔ محکمہ موسمیات کے مطابق مری اور گردونواح میں یکم جون تک بارش کا امکان ہے۔

اسلام آباد میں درخت اور بل بورڈز گرگئے

اسلام آباد میں تیز جھکڑ کے باعث درخت گر گئے، نیشنل پریس کلب میں ایک بڑا بل بورڈ آ گرا۔ جس کے بعد ڈی سی اسلام آباد نے تمام بڑے بل بورڈز فوری طور پر ہٹانے کی ہدایت جاری کر دی۔

جی سکس، آبپارہ اور بلیو ایریا میں درخت ٹوٹ کر گاڑیوں پرجا گرے جس سے گاڑیوں کو نقسان پہنچا۔

اسسٹنٹ کمشنرز کو نشیبی علاقوں پر خصوصی نظر رکھنے کی ہدایت کی گئی ہے، جبکہ ممکنہ طوفانی بارشوں کے پیش نظر ضلعی انتظامیہ کی ٹیمیں فیلڈ میں موجود ہیں۔

محکمہ موسمیات کے مطابق یکم جون تک راولپنڈی اوراسلام آباد میں آندھی، طوفان اورتیز بارشوں کا امکان ہے، جبکہ اس دوران چند مقامات پرژالہ باری بھی ہوسکتی ہے۔۔

این ڈی ایم اے کی جانب سے ممکنہ موسمی صورتحال کے پیش نظرشہریوں کو محتاط رہنے کا کہا گیا ہے۔

بلوچستان میں بھی آندھی اور مٹی کے طوفان

بلوچستان کے علاقوں قلعہ عبداللہ، پشین، قلعہ سیف اللہ اور لورالائی میں بھی آندھی اور مٹی کے طوفان نے نظام زندگی متاثر کیا۔

شاہراہِ قراقرم پر طغیانی اور لینڈ سلائیڈنگ

ادھر کوہستان کے علاقے لوئر کوہستان میں شاہراہِ قراقرم پر طغیانی اور لینڈ سلائیڈنگ کے باعث عارضی بند کر دی گئی۔

کھیدر نالہ، نالہ جیجال بازار اور آبشار نالہ کے مقامات پر شدید مٹی کے تودے گرنے سے سڑک ہر قسم کی ٹریفک کے لیے بند ہے۔ مانسہرہ ابیٹ آباد روڈ پر طغیانی کے باعث کئی گھنٹے تک ٹریفک کی روانی متاثر رہا۔

ڈی پی او کوہستان نے تمام تھانوں اور چوکیوں کو الرٹ رہنے کی ہدایت کی ہے۔

محکمہ موسمیات نے آئندہ چوبیس گھنٹوں کے دوران پنجاب اور خیبرپختونخوا کے مختلف علاقوں میں مزید بارش کی پیشگوئی کی ہے۔