خیبرپختونخوا حکومت نے سیلاب کے باعث ہونے والے جانی نقصان کے باعث کل یوم سوگ منانے کا اعلان کردیا۔

وزیراعلیٰ خیبر پختونخوا علی امین گنڈاپور نے تصدیق کی ہے کہ صوبائی حکومت کا ایم آئی 17 ہیلی کاپٹر باجوڑ کے بارشوں سے متاثرہ علاقوں میں امدادی سامان لے جاتے ہوئے خراب موسم کے باعث کریش کرگیا۔

علی امین گنڈا پور کے مطابق یہ حادثہ باجوڑ کے متاثرہ علاقے کی جانب امدادی مشن کے دوران پیش آیا، جس میں 2 پائلٹس سمیت عملے کے 5 افراد شہید ہوئے۔

وزیراعلیٰ کے مطابق حادثے کی اطلاع ملتے ہی امدادی ٹیمیں جائے وقوعہ پر روانہ کردی گئیں، جبکہ شہدا کی میتوں کو پورے سرکاری اعزاز کے ساتھ سپرد خاک کیا جائے گا۔

اس سانحے پر صوبائی حکومت نے کل صوبے میں سوگ کا اعلان کیا ہے اور قومی پرچم سرنگوں رکھنے کی ہدایت جاری کی ہے۔

وزیراعلیٰ خیبرپختونخوا نے کہا کہ ہم شہدا کے اہل خانہ کے غم میں برابر کے شریک ہیں اور ان کے لیے صبر جمیل کی دعا کرتے ہیں۔

انہوں نے شہدا کو خراج تحسین پیش کرتے ہوئے کہا کہ ہیلی کاپٹر عملے نے دوسروں کی جانیں بچانے کے لیے اپنی جانیں قربان کیں، یہ ہمارے اصل ہیرو ہیں اور ان کی قربانی تاریخ میں سنہرے حروف سے لکھی جائے گی۔

وزیراعلیٰ پنجاب مریم نواز کا وزیراعلیٰ علی امین گنڈا پور کو ٹیلی فون

وزیراعلیٰ پنجاب مریم نواز شریف نے وزیراعلیٰ خیبرپختونخوا علی امین گنڈا پور کو ٹیلی فون کیا اور خیبرپختونخوا میں قیمتی جانوں کے ضیاع پر افسوس کا اظہار کیا۔

مریم نواز نے متاثرہ خاندانوں سے اظہار ہمدردی اور ریسکیو ہیلی کاپٹر کے حادثے میں شہادتوں پر تعزیت بھی کی۔

وزیراعلیٰ پنجاب نے کہا کہ مشکل کی اس گھڑی میں پنجاب حکومت کے تمام وسائل خیبرپختونخوا حکومت اور عوام کے ڈسپوزل پر ہیں، اہل پنجاب اپنے خیبرپختونخوا کے بھائیوں اور بہنوں کے غم میں شریک ہیں۔

مریم نواز نے پاکستان مسلم لیگ (ن) کے صدر محمد نواز شریف کی طرف سے بھی شہادتوں پر تعزیت کی۔ وزیراعلیٰ خیبرپختونخوا علی امین گنڈا پور نے وزیراعلی پنجاب کا فون کرنے اور تعزیت پر شکریہ ادا کیا۔

علی امین گنڈا پور نے وزیراعلیٰ پنجاب کی طرف سے خیبرپختونخوا کے عوام کی بھرپور مدد کی یقین دہانی پر بھی شکریہ ادا کیا۔