پشاور میں پاکستان تحریک انصاف کی پارلیمانی پارٹی کا اہم اجلاس آج طلب کر لیا گیا ہے۔ اجلاس صبح 11 بجے ہوگا جس میں وزیراعلیٰ خیبرپختونخوا علی امین گنڈا پور پارٹی ارکان کو شرکت کی ہدایت دے چکے ہیں۔

حکومتی ذرائع کے مطابق اجلاس کی صدارت خود وزیراعلیٰ کریں گے، جس میں عدالتی فیصلے کے بعد آئندہ کے لائحہ عمل پر تفصیلی مشاورت کی جائے گی۔ اجلاس میں اپوزیشن کی متحرک صف بندی کے تناظر میں اہم فیصلے متوقع ہیں۔

مخصوص نشتیں ہم سے لی گئیں، عدلیہ کا یہ اقدام سیاہ الفاظ میں لکھا جائے گا، عمر ایوب

اجلاس کے دوران وزیراعلیٰ پارٹی ارکان کو حالیہ پیش رفت پر اعتماد میں لیں گے اور موجودہ سیاسی و پارلیمانی صورتحال سمیت صوبے کے اہم امور پر بھی مشاورت کی جائے گی۔ حکومتی اراکین کے مطابق مخصوص نشستوں سے متعلق آئندہ کی حکمت عملی طے کی جائے گی۔

دوسری جانب صوبائی وزیر قانون و پارلیمانی امور آفتاب عالم حکومتی پارلیمانی پارٹی کے اجلاس سے لاعلم نکلے۔ انہوں نے آج نیوز سے گفتگو میں کہا کہ سنا ہے اجلاس طلب کیا گیا ہے، لیکن میرے علم میں نہیں ہے۔

انہوں نے کہا کہ مخصوص نشستوں کے حوالے سے ابھی کوئی لائحہ عمل طے نہیں ہوا۔