خیبرپختونخوا میں گرمی کی شدت خطرناک حد تک بڑھنے لگی، جس کے پیش نظر جنرل ڈائریکٹوریٹ آف سول ڈیفنس نے شہریوں کے لیے خصوصی ہدایات اور انتباہ جاری کر دیا۔

سول ڈیفنس کے مطابق آئندہ دنوں میں درجہ حرارت 47 سے 55 ڈگری سیلسیس تک جا سکتا ہے، جبکہ گھٹن زدہ موسم صحت کے لیے خطرناک ثابت ہو سکتا ہے۔ شہریوں کو ہدایت کی گئی ہے کہ وہ شدید گرمی کے دوران خصوصی احتیاطی تدابیر اختیار کریں۔

محکمہ نے شہریوں سے کہا ہے کہ گاڑیوں کو گیس والے مواد، لائٹرز، کاربونیٹڈ مشروبات، پرفیوم اور بیٹری سے خالی رکھیں۔ گاڑی کی کھڑکیاں جزوی کھلی رکھیں اور ایندھن ٹینک مکمل نہ بھریں۔ ایندھن شام کے وقت بھروایا جائے اور ٹائروں میں ہوا کی مقدار بھی اعتدال میں رکھی جائے۔

خیبر پختونخوا میں شدید گرمی ، محکمہ موسمیات نے ہیٹ ویو الرٹ جاری کر دیا

مزید ہدایات میں کہا گیا ہے کہ بچھو اور سانپ بلوں سے نکل کر ٹھنڈی جگہوں کی تلاش میں گھروں اور کھیتوں میں داخل ہو سکتے ہیں، لہٰذا احتیاط کریں۔ گیس سلنڈرز کو دھوپ سے دور رکھا جائے اور بجلی کے میٹروں پر غیر ضروری بوجھ نہ ڈالا جائے۔

سول ڈیفنس نے شہریوں کو ہدایت کی ہے کہ دن 10 بجے سے 3 بجے کے درمیان دھوپ میں نکلنے سے گریز کریں اور پانی و مشروبات کا زیادہ استعمال کریں تاکہ گرمی سے محفوظ رہا جا سکے۔