پشاور میں فیڈرل کانسٹیبلری (ایف سی) کے ہیڈکوارٹر پر پیر کی صبح 8 بج کر 10 منٹ پر خوفناک دہشتگرد حملہ ہوا۔ آئی جی خیبر پختونخوا پولیس ذوالفقار حمید کے مطابق دہشتگردوں نے خودکش حملہ کیا جس میں تین ایف سی اہلکار شہید ہوگئے۔

آئی جی ذوالفقار حمید کے مطابق ایف سی جوانوں نے بہادری سے دہشتگرودں کا مقابلہ کیا اور دو حملہ آوروں کو فائرنگ کے تبادلے میں ہلاک کر دیا۔ جبکہ ایک حملہ آور نے خود کو مین گیٹ پر ہی اُڑا دیا۔ مجموعی طور پر تین دہشتگرد مارے گئے۔

پولیس کے مطابق گیٹ پر تعینات ایف سی کے 3 اہلکار شہید ہوئے جبکہ 4 زخمی ہوئے۔
خیبرپختونخوا: 3 اہم کمانڈرز سمیت 17 دہشتگرد ہلاک، دوغڑا پل پر حملہ ناکام

ریسکیو ترجمان نے بتایا کہ دھماکے کے 5 زخمیوں کو لیڈی ریڈنگ اسپتال منتقل کیا گیا جن میں چار ایف سی اہلکار اور ایک راہگیر بھی شامل ہیں۔

شہداء میں حوالدار عالمزیب خان، سپاہی ریاست خان اور سپاہی الطاف خان شامل ہیں، جن کا تعلق پلاٹون 277 اور 478 سے ہے۔

دھماکے میں متعدد اہلکار زخمی بھی ہوئے، جن میں لانس نائیک ظاہر، سپاہی ارشد، سپاہی ریاست خان اور سپاہی عرفان خان شامل ہیں۔

حملے میں ایک سویلین ٹیلر ماسٹر امجد خان بھی زخمی ہوئے۔

ترجمان کے مطابق تمام زخمیوں کی حالت خطرے سے باہر ہے اور ایل آر ایچ میں فوری طور پر ایمرجنسی نافذ کر دی گئی ہے۔