پاکستان نے دوسرے ٹی ٹوئنٹی میچ میں آسٹریلیا کو جیت کے لیے 199 رنز کا ہدف دیا ہے۔ شاہینوں نے پہلے بیٹنگ کرتے 5 وکٹوں پر 198 رنز اسکور کیے۔

لاہور کے قذافی اسٹیڈیم میں جاری دوسرے ٹی ٹوئنٹی میچ میں پاکستان نے آسٹریلیا کے خلاف ٹاس جیت کر بیٹنگ کا فیصلہ کیا۔ پاکستانی بیٹرز نے 17 رنز کے مجموعی اسکور پر پہلی وکٹ گرنے کے بعد جارحانہ انداز اپنائے رکھا۔

کپتان سلمان آغا نے 76 اور وکٹ کیپر بیٹر عثمان خان نے 53 رنز کی شاندار اننگز کھیلی۔ شاداب خان 28 اور محمد نواز 9 رنز بنا کر ناٹ آؤٹ رہے۔ صائم ایوب 17، صاحبزادہ فرحان 5 اور بابر اعظم 2 رنز بنا سکے۔
آسٹریلیا کی جانب سے میتھیو شارٹس کے علاوہ تمام بولرز نے ایک، ایک کھلاڑی کو آؤٹ کیا۔

دوسرے ٹی ٹوئنٹی میچ میں قومی ٹیم میں 3 تبدیلیاں کی گئی ہیں۔ فخر زمان، شاہین آفریدی اور سلمان مرزا کو آرام دیا گیا ہے جبکہ فہیم اشرف، نسیم شاہ اور عثمان طارق پلیئنگ الیون میں شامل ہیں۔ آسٹریلیا کی ٹیم میں کپتان مچل مارش کی فائنل الیون میں واپسی ہوئی ہے۔

پاکستان نے سیریز کا پہلا میچ 22 رنز سے اپنے نام کیا تھا جب کہ سیریز کا آخری میچ کل کھیلا جائے گا۔