عالمی اور مقامی صرافہ مارکیٹوں میں سونے کی قیمت میں مسلسل اضافے کے بعد نمایاں کمی دیکھنے میں آئی ہے، بلند ترین سطح پر پہنچنے کے بعد ملک میں سونے کی قیمت میں بڑی کمی واقع ہوگئی۔

عالمی اور مقامی صرافہ مارکیٹ میں سونے کی قیمت میں کمی کے بعد سونے کی فی تولہ قیمت 4 لاکھ 37 ہزار 362 روپے ہو گئی۔

اسی طرح 10 گرام سونا 6463 روپے کی کمی سے 3 لاکھ 74 ہزار 967 روپے کا ہو گیا۔

بین الاقوامی سطح پر بھی سونے کی قیمت میں کمی آئی ہے، جہاں عالمی قیمت 85 ڈالر فی اونس کم ہو کر 4150 ڈالر فی اونس ہوگئی ہے۔

گذشتہ ہفتوں میں امریکا میں شرح سود میں ممکنہ کمی کے پیش نظر سونے میں سرمایہ کاری کے باعث قیمتوں میں نمایاں اضافہ ہوا تھا، اور پیر کو سونے کی قیمت 4,381 ڈالر فی اونس کی ریکارڈ سطح تک پہنچ گئی تھی۔

رواں سال سونے کی قیمتوں میں 60 فیصد اضافہ ریکارڈ کیا گیا، جس کی وجہ جغرافیائی سیاسی اور معاشی غیر یقینی صورتحال اور شرح سود میں کمی تھی۔

ماہرین کا کہنا ہے کہ عالمی سطح پر سونے کی قیمتوں میں کمی نے سرمایہ کاروں کو محتاط کیا ہے، اور یہ کمی امریکی ڈالر کی طاقت اور دیگر عالمی اقتصادی اثرات کے باعث ہوئی ہے۔

مقامی مارکیٹ میں بھی سونے کی قیمتوں میں کمی آئی ہے، جس سے خریداروں کے لیے سونا نسبتاً سستا ہوگیا ہے، تاہم توقع کی جا رہی ہے کہ عالمی سطح پر قیمتوں میں مزید اتار چڑھاؤ آ سکتا ہے۔