پاکستان تحریک انصاف کے بانی چیئرمین عمران خان کی ہدایت پر وزیراعلیٰ خیبرپختونخوا علی امین گنڈا پور نے اپنے عہدے سے مستعفی ہونے کا اعلان کردیا ہے، ان کی جگہ سہیل آفریدی کو خیبرپختونخوا کا نیا وزیراعلیٰ بنانے کا فیصلہ کیا گیا ہے جب کہ انہوں نے اپنا استعفیٰ گورنر خیبرپختونخوا فیصل کریم کنڈی کو بھجوادیا۔

بدھ کو ایک ویڈیو بیان میں علی امین گنڈاپور نے اپنے عہدے سے مستعفی ہونے کا اعلان کرتے ہوئے کہا کہ وزیراعلیٰ کا عہدہ بانی چیئرمین پی ٹی آئی عمران خان کی امانت تھی اور ان کے حکم پر امانت واپس کرکے وزارت اعلیٰ کے عہدے سے استعفیٰ دے رہا ہوں۔

انہوں نے مزید کہا کہ سہیل آفریدی کو میری مکمل حمایت اور سپورٹ حاصل رہے گی، ہم بانی چیئرمین پی ٹی آئی کی رہائی اور پارٹی پالیسی کے لیے ایک ہو کر آگے بڑھیں گے۔

امین گنڈا پور نے اپنا استعفیٰ گورنر خیبرپختونخوا کو بھجوادیا

بعدازاں وزیراعلیٰ خیبرپختونخوا علی امین گنڈا پور نے اپنا استعفیٰ گورنر خیبرپختونخوا فیصل کریم کنڈی کو بھجوادیا۔

علی امین گنڈا پور نے اپنے استعفے میں لکھا کہ اپنے لیڈر عمران خان کے حکم پر عمل کرتے ہوئے مستعفی ہورہا ہوں، جب صوبہ سنبھالا تو مالی تباہی اور دہشت گردی کا سامنا تھا، دونوں چیلنجز سے نمٹے اور کوئی دعویٰ کروں نہ کروں لیکن یہ ضرور کہوں گا کہ میں نے صوبے کے لوگوں کی انتہائی اخلاص کے ساتھ خدمت کی ہے۔

آخر میں علی امین گنڈا پور نے کہا کہ “پاکستان زندہ باد، پاکستان تحریکِ انصاف پائندہ باد!”

علی امین گنڈا پور کے استعفے سے متعلق بیرسٹر گوہر کا بیان

چیئرمین پی ٹی آئی بیرسٹر گوہر نے میڈیا سے گفتگو کرتے ہوئے کہا کہ خیبرپختونخواحکومت میں تبدیلی عمران خان کی خواہش ہے، وزیراعلیٰ کو استعفیٰ دینے کی ہدایت کی گئی ہے، میری علی امین گنڈا پور سے 3 مرتبہ بات ہوئی ہے، علی امین گنڈاپور نے کہا کہ میں استعفی آپ کے حوالے کروں؟۔

بیرسٹر گوہر نے کہا کہ آرٹیکل 130 آٹھ کے مطابق وزیراعلیٰ کو استعفی گورنر کو بھیجنا ہوتا ہے، میں استعفی خود منظور کرنے کا مجاز نہیں ہوں، عمران خان کی بات کو رد کرنا کسی کمیٹی کا مجاز نہیں، بانی کی ہدایت پر عمل ہوگا، علی امین گنڈا پور جلد پشاور کے لیے روانہ ہوں گے، علی امین گنڈا پور سمری کے ذریعے اپنا استعفیٰ کل گورنر کو بھجوائیں گے۔

انہوں نے مزید کہا کہ تحریک انصاف میں کوئی فارورڈ بلاک نہیں ہے، کے پی میں پی ٹی آئی کے 91 ایم پی ایز متحد ہیں، گنڈا پور نے وہ کردار ادا کیا کہ دنیا یاد رکھے گی۔

علی امین گنڈا پور کو وزارت اعلیٰ سے ہٹائے جانے کی تصدیق

اس سے قبل پی ٹی آئی کے جنرل سیکرٹری سلمان اکرم راجہ نے علی امین گنڈا پور کو وزارت اعلیٰ سے ہٹائے جانے کی تصدیق کرتے ہوئے بتایا تھا کہ یہ بات درست ہے علی امین گنڈا پور کو وزارت اعلی سے ہٹایا گیا ہے، سہیل آفریدی کو خیبرپختونخوا کا نیا وزیراعلیٰ نامزد کیا گیا گیا ہے۔

پی ٹی آئی کے فوکل پرسن رائے سلمان نے بتایا تھا کہ عمران خان نے توشہ خانہ کیس کی سماعت کے دوران پارٹی رہنماؤں کو علی امین گنڈاپور کو عہدے سے ہٹانے کے احکامات دیے ہیں۔

پشاور میں غیر رسمی گفتگو کے دوران صحافی نے سہیل آفریدی سے سوال کیا تھا کہ آپ وزیراعلیٰ خیبرپختونخوا بننے جا رہے ہیں، جس کے جواب میں سہیل آفریدی نے کہا تھا کہ میرا نام کافی دنوں سے زیر گردش ہے، عمران خان کی جانب سے باضابطہ ہدایت موصول نہیں ہوئی۔

چیئرمین پی ٹی آئی بیرسٹر گوہر نے سوشل میڈیا اکاؤنٹ ’ایکس‘ پر وضاحتی بیان میں کہا کہ میں نے علی امین گنڈا پور کے بارے میں میڈیا کو کوئی بیان نہیں دیا، تمام افواہیں پارٹی کو تقسیم کرنے کی سازش ہیں، ہم اس کی سختی سے مخالفت کرتے ہیں۔

بیرسٹر گوہر نے کہا کہ میں نے کسی بھی میڈیا ادارے سے یہ بات نہیں کی کہ خیبرپختونخوا کے وزیراعلیٰ کی تبدیلی کی خبر جعلی ہے یا یہ پارٹی کے خلاف کوئی سازش ہے، اس حوالے سے نجی ٹی وی نے خود وضاحت کردی ہے کہ انہوں نے جو خبر نشر کی تھی، وہ درست نہیں تھی۔

پی ٹی آئی پنجاب کے رہنما فیصل ندیم گورچانی نے اڈیالہ جیل کے باہر صحافیوں سے گفتگو کرتے ہوئے کہا کہ جو بھی وزیر اعلیٰ آے گا ہمارا ہی ہوگا، رائے سلمان نے جیل سے باہر آکر بانی پی ٹی آئی کے فیصلے سے آگاہ کیا۔