ایران کے صدر ڈاکٹر مسعود پیزشکیان نے وزیراعظم شہباز شریف سے ٹیلی فونک رابطہ کرکے سیلاب سے ہونے والے نقصانات پر دلی دکھ کا اظہار کیا اور متاثرین کی ہر ممکن مدد کی پیشکش کی ہے۔

جمعے کو وزیراعظم شبہازشریف سے اسلامی جمہوریہ ایران کے صدر ڈاکٹر مسعود پیزشکیان نے ٹیلی فونک رابطہ کیا اور پاکستان کے مختلف حصوں میں سیلاب پر پاکستانی عوام سے دلی تعزیت کا اظہار کیا۔

ایرانی صدر نے حالیہ سیلاب میں جانی اور مالی نقصان پر متاثرہ خاندانوں سے ہمدردی اور یک جہتی کا اظہار کرتے ہوئے اس مشکل وقت میں پاکستان کے برادر عوام کو ہر ممکن مدد فراہم کرنے کی پیشکش کی۔

اعلامیے کے مطابق وزیراعظم نے صدر پیزشکیان کی جانب سے ہمدردی و یکجہتی کے اظہار اور ایران کی طرف سے دکھ اور تکلیف کی اس گھڑی میں اظہار یک جہتی پر شکریہ ادا کیا۔

شہباز شریف نے ایرانی صدر کو ایران کے سپریم لیڈر آیت اللہ علی خامنہ ای کے لیے گہرے احترام اور نیک خواہشات کا پیغام دیا۔

دونوں رہنماؤں نے چین کے شہر تیانجن میں ہونے والے شنگھائی تعاون تنظیم (ایس سی او) کے سربراہی اجلاس کے موقع پر متوقع ملاقات اور گفتگو کے حوالے سے مثبت خیالات کا بھی اظہار کیا۔