پاکستان تحریک انصاف (پی ٹی آئی) کے بانی چیئرمین عمران خان کے خلاف وزیراعظم شہبازشریف کی جانب سے کیے ہرجانے کا کیس سپریم کورٹ پہنچ گیا، جہاں سابق وزیراعظم نے عدالتی دائرہ اختیار عدالت عظمیٰ میں چیلنج کردیا۔

تفصیلات کے مطابق وزیراعظم شہباز شریف کی جانب سے دائر کردہ ہرجانہ کیس کے خلاف سابق وزیراعظم عمران خان نے سپریم کورٹ سے رجوع کر لیا۔

بانی چیئرمین پی ٹی آئی نے سپریم کورٹ میں دائر درخواست میں عدالتی دائر اختیار کو چیلنج کیا ہے اور استدعا کی ہے کہ ہرجانہ کیس کی کارروائی اپیل پر فیصلے تک معطل کی جائے۔

درخواست میں کہا گیا ہے کہ قانون کے مطابق ڈسٹرک اینڈ سیشن عدالت ہی ہرجانہ کیس کی سماعت کر سکتی ہے۔

ایڈیشنل سیشن جج کی عدالت کے دائرہ اختیار پر اعتراض کرتے ہوئے درخواست میں کہا گیا ہے کہ ایڈیشنل سیشن جج نے اعتراض مسترد کیا اور لاہور ہائیکورٹ نے اس فیصلے کو برقرار رکھا ہے۔

بانی پی ٹی آئی کی جانب سے سپریم کورٹ سے درخواست کی گئی ہے کہ لاہور ہائیکورٹ اور ایڈیشنل سیشن جج کے احکامات کالعدم قرار دیے جائیں اور اپیل پر فیصلے تک لاہور ہائیکورٹ کا فیصلہ معطل کرکے کارروائی سے روکا جائے۔