آپریشن سندور میں شرمناک ناکامی کے بعد بھارتی فوج اور مودی سرکار کے درمیان تناؤ میں نمایاں اضافہ ہو گیا ہے۔ حالیہ پاک بھارت جنگ میں عبرتناک شکست کے بعد بھارتی فوجی افسران نے اس ناکامی کا الزام براہ راست سیاسی قیادت پر ڈال دیا ہے۔

انڈونیشیا میں منعقدہ ”انڈیا پاکستان ائیر بیٹل“ سیمینار کے دوران بھارتی اتاشی نیوی آفیسر کیپٹن شیو کمار نے کھلے الفاظ میں بھارتی فضائیہ کے طیاروں کے نقصان کا اعتراف کیا۔ کیپٹن شیو کمار نے کہا کہ ”پاکستان کے خلاف کارروائی میں بھارتی فضائیہ کو طیاروں کے نقصان کا سامنا کرنا پڑا“۔ انہوں نے یہ بھی واضح کیا کہ مودی حکومت کے سخت سیاسی احکامات نے بھارتی فضائیہ کی کارروائیاں محدود کیں اور بھارتی افواج خودمختار نہیں بلکہ سیاسی احکامات کی پابند ہیں۔

کیپٹن شیو کمار کے ان انکشافات کے بعد کانگریس نے مودی سرکار کو شدید تنقید کا نشانہ بنایا۔ کانگریس نے کہا کہ مودی حکومت کی سیاسی مداخلت کے باعث بھارتی فضائیہ پاکستانی فوجی اہداف کو نشانہ نہ بنا سکی۔ پارٹی نے یہ سوال اٹھایا کہ مودی سرکار آل پارٹیز اجلاس بلانے سے گریز کر کے اپوزیشن اور قوم دونوں سے حقائق کیوں چھپا رہی ہے؟ مزید کہا گیا کہ اس حساس قومی مسئلے پر پارلیمنٹ کا خصوصی اجلاس بلانے کا مطالبہ کیوں مسترد کر دیا گیا؟

کانگریس نے یاد دہانی کرائی کہ اس سے قبل چیف آف ڈیفنس اسٹاف انیل چوہان بھی آپریشن سندور کے دوران بھارتی طیاروں کے گرنے کا اعتراف کر چکے ہیں۔ پارٹی نے ٹویٹ میں کہا، ’آپریشن سندور مودی سرکار کی عسکری ناکامی، سیاسی جھوٹ اور نااہل قیادت کی شرمناک علامت بن چکا ہے‘۔

مودی حکومت پر الزام عائد کیا گیا ہے کہ وہ میدانِ جنگ میں نہیں بلکہ صرف گودی میڈیا پر بیانیہ کی جنگ لڑ رہی ہے، اور فوجی نقصانات چھپانے کی کوشش دراصل مودی سرکار کے جھوٹے بیانیے اور عوام دشمن پالیسیوں کا کھلا ثبوت ہے۔

مبصرین کا کہنا ہے کہ بھارتی فوج نے عملی شکست تسلیم کر لی ہے، مگر مودی سرکار اب بھی قوم کو اندھیرے میں رکھ رہی ہے۔