قومی کرکٹ ٹیم کے کپتان بابر اعظم اور محمد رضوان گزشتہ چند دنوں سے امریکا میں موجود ہیں۔

بابراعظم اور محمد رضوان ہارورڈ یونیورسٹی بزنس اسکول کا بزنس آف انٹرٹینمنٹ، میڈیا اینڈ اسپورٹس (بی ای ایم ایس) کورس کامیابی سے مکمل کرچکے ہیں۔

دونوں کرکٹرز ہارورڈ بزنس اسکول میں اپنے وقت کے دوران کمیونٹی کے مختلف افراد کے ساتھ فعال طور پر مشغول رہے جب کہ بابر اور رضوان کورس کرنے والے پہلے کرکٹرز ہیں۔

کپتان بابر اعظم اور وکٹ کیپر بلے باز نے دورہ امریکا کے موقع پر مکسڈ مارشل آرٹس کے عالمی چیمپیئنز کامارو عثمان، فرانسس نگانو اور امریکی رگبی کھلاڑی جیمیز ونسٹن سے ملاقات کی۔

بابر اعظم نے خوشگوارملاقات کی تصویر ٹوئٹر پر شیئر کردی جس میں ہیوی ویٹ چیمپئن فرانسس نگانو بلا تھامے ہوئے محمد رضوان کے برابر میں کھڑے ہیں۔

اپنی ٹویٹ میں قومی کرکٹ ٹیم کے کپتان نے لکھا کہ جب کامارو عثمان، فرانسس نگانو اور ونسٹن جیسے چیمپیئنز کرکٹ کھیلنے کے لیے رضا مندی ظاہر کردیں تو رضوان اور مجھے اب کسی دوسرے کھیل میں شامل ہونا چاہئے۔