صوبہ پنجاب کے شہر ملتان کی تحصیل جلال پور پیر والہ میں سیلاب کے باعث موٹروے ایم 5 تاحال بند ہے تاہم موٹروے کی بحالی کے لیے کام جاری ہے۔ ترجمان موٹروے کے مطابق موٹروے ایم 5 پر اب تک 13 پوائنٹس متاثر ہو چکے ہیں جب کہ مزید چار سے پانچ پوائنٹس متاثر ہونے کا خدشہ ہے۔

پنجاب میں سیلاب کی بتاہ کاریاں جاری ہے، جلال پور پیر والا کے مقام پر موٹروے پر پڑنے والا شگاف تاحال نہ بھرا جاسکا، جس کے باعث 9 ویں روز بھی موٹروے پر ٹریفک معطل ہے جب کہ شگاف کو مزید بڑھنے سے روکنے کے لیے پتھر ڈالے جارہے ہیں۔

ترجمان موٹر وے پولیس کے مطابق سیلاب کے باعث موٹر وے ایم 5 اب تک 13 مقامات سے متاثر ہو چکی ہے جب کہ موٹر وے ایم 5 پر مزید 4 سے 5 پوائنٹس متاثر ہونے کا خدشہ ہے۔

موٹر وے پولیس کے ترجمان کا بتانا ہے کہ موٹر وے ایم 5 سیلاب کی وجہ سے تا حال بند ہے، ملتان سے سکھر متبادل راستے سے سفر کیا جاسکتا ہے، شاہ شمس انٹرچینج سے قومی شاہراہ کی طرف ٹریفک جا سکتی ہے۔

ترجمان موٹر وے پولیس کا کہنا ہے کہ اوچ شریف کے راستے انٹرچینج سے دوبارہ موٹر وے ایم 5 پر سفر کیا جا سکتا ہے جبکہ سکھر سے ملتان ایم 5 اوچ شریف انٹر چینج قومی شاہراہ پر سفر کیا جا سکتا ہے۔

موٹر وے پولیس ترجمان کے مطابق شیر شاہ انٹرچینج سے دوبارہ موٹر وے ایم 5 کو جوائن کیا جا سکتا ہے، موٹروے پولیس سفر کرنے والوں کی رہنمائی کے لیے موقع پر موجود ہے۔

مظفرگڑھ میں حالیہ سیلاب کے بعد پانی کی سطح معمول پر آگئی، مظفرگڑھ ضلع کے 160 سے زائد موضع جات شدید متاثر ہوئے جہاں 2 لاکھ 10ہزار ایکٹر سے زائد رقبے کو نقصان پہنچا جب کہ متاثرین نے گھروں کو واپس جانا شروع کردیا۔

علی پور سے سیدو پور جانے والے روڈ پر ایک مقام پر عارضی پل بنا دیا گیا جب کہ دوسرے پل کی تعمیر کے لیے تیزی سے کام جاری ہے۔

چشتیاں میں سیلاب متاثرین کی مشکلات میں کمی نہ سکی، بستی عاشق محمد میں سیلاب سے متاثرہ لوگ سراپا احتجاج ہوگئے جب کہ متاثرین نے بجلی کے بل پھاڑ دیے اور بل معاف کرنے کا مطالبہ کردیا۔

لیاقت پور کے 35 موضع جات میں سیلاب نے تباہی مچائی ہے، جس کے باعث رابطہ سڑکیں ٹوٹ پھوٹ کا شکار ہیں اور متاثرین واپس گھر جانے لگے۔