طوفانی بارشوں اور بھارتی آبی جارحیت کے بعد بہاولنگر میں دریائے ستلج سے ملحقہ علاقے خطرے کی لپیٹ میں آگئے ہیں جبکہ بھارت نے دریائے ستلج میں پانی چھوڑنے کی اطلاع دی ہے۔

ذرائع کے مطابق بھارت نے دریائے ستلج میں پانی چھوڑنے کی اطلاع دے دی ہے، بھارت نے اطلاع سفارتی ذرائع سے پاکستان کو دی، بھارت نے سندھ طاس معاہدے کے تحت اطلاع نہیں دی۔

ذرائع کے مطابق ماضی میں بھارتی واٹر کمیشن براہ راست اطلاع دیتا تھا۔ پاکستانی حکام نے بھارتی اطلاع سے انڈس واٹر کمیشن کو آگاہ کیا جبکہ پاکستانی انڈس واٹرکمیشن نے سیلاب سے متعلقہ اداروں کو آگاہ کردیا ہے۔

ذرائع نے بتایا کہ بھارت نے دریائے توی میں بھی پانی چھوڑنے کی اطلاع دی ہے، ہریکے کے مقام پر پانی کے بہاؤ میں اضافہ ہوا ہے، ہریکے ڈاؤن سٹریم میں اونچے درجے کے سیلاب کی وارننگ جاری کردی گئی ہے۔

ترجمان کے مطابق دریائے ستلج اور ملحقہ ندیوں میں پانی کے بہاؤ میں اضافہ ہوگا۔

پی ڈی ایم اے پنجاب نے متعلقہ ڈپٹی کمشنرز کو الرٹ رہنے کی ہدایات جاری کی ہیں جبکہ لاہور، ساہیوال، ملتان، بہاولپور،ڈیرہ غازی خان کے کمشنرز کو الرٹ جاری کردیا ہے۔

دریائے ستلج کے کنارے سیلابی صورتِ حال سنگین، کئی دیہات زیرِ آب

طوفانی بارشوں اور بھارتی آبی جارحیت کے بعد بہاولنگر کے دریائے ستلج سے ملحقہ علاقے شدید خطرات کی لپیٹ میں آگئے ہیں۔ سیلابی ریلوں نے دریائی پٹی میں تباہی مچا دی ہے جبکہ زمینی کٹاؤ کا سلسلہ تیزی سے جاری ہے۔

متعدد دیہاتوں میں پانی داخل ہونے سے سیکڑوں ایکڑ پر کھڑی فصلیں دریا برد ہوگئیں۔ زرعی زمینیں تباہ ہونے کے باعث کاشت کار شدید مشکلات کا شکار ہیں۔

ضلعی انتظامیہ اور ریسکیو اداروں نے متاثرہ علاقوں میں ریلیف آپریشن تیز کردیا ہے تاہم مسلسل بڑھتے پانی کے بہاؤ نے صورتِ حال مزید سنگین بنا دی ہے۔

مقامی افراد نے حکام سے فوری اقدامات اور حفاظتی بند مضبوط بنانے کا مطالبہ کیا ہے تاکہ جانی و مالی نقصان سے بچا جا سکے۔