وفاقی وزیرداخلہ محسن نقوی نے کہا ہے کہ زائرین کو سڑک کے ذریعے عراق اور ایران جانے کی اجازت نہیں۔ زائرین فضائی سفر کر سکیں گے۔ یہ فیصلہ عوام کے تحفظ اور قومی سلامتی کے مفاد میں کیا ہے۔ وزیراعظم نے زائرین کے لیے پروازوں کا انتظام کرنے کی ہدایت کی ہے۔

وفاقی وزیر داخلہ محسن نقوی نے سماجی رابطے کی ویب سائیٹ پر اپنے بیان میں کہا کہ زائرین کو سڑک کے ذریعے عراق اور ایران جانے کی اجازت نہیں دی جائے گی، بلکہ وہ فضائی سفر کے ذریعے ہی اپنے مذہبی سفر پر جا سکیں گے۔ یہ فیصلہ عوام کے تحفظ اور قومی سلامتی کے مفادات کو مدنظر رکھتے ہوئے کیا گیا ہے۔

محسن نقوی نے ایکس پر بیان میں بتایا کہ وزیراعظم محمد شہباز شریف نے زائرین کی سہولت کے لیے خصوصی پروازوں کا انتظام کرنے کی ہدایت جاری کی ہے تاکہ مذہبی مقامات تک رسائی آسان اور محفوظ بنائی جا سکے۔

انہوں نے کہا کہ یہ حکومتی فیصلہ قومی سلامتی اور عوامی حفاظت کے لیے ناگزیر ہے۔

واضح رہے کہ اس سے قبل وزیراعظم محمد شہباز شریف سے وزیرِ داخلہ محسن نقوی نے ملاقات کی، جس میں ملک کی داخلی صورتحال اور اہم امور پر تبادلہ خیال کیا گیا۔ ملاقات میں وزیرِ داخلہ نے وزیراعظم کو زائرین سے متعلق نئی پالیسی پر تفصیلی بریفنگ دی۔

وزیراعظم نے وفاقی وزیر داخلہ کو زائرین کی سہولت کے لیے خصوصی پروازوں کے انتظامات کرنے کی ہدایت جاری کی، تاکہ مذہبی مقامات پر جانے والے افراد کو بہتر سہولیات فراہم کی جا سکیں۔

ملاقات میں بلوچستان کی امن و امان کی صورتحال پر بھی تبادلہ خیال ہوا، جس پر وزیرِ داخلہ نے تازہ ترین پیشرفت سے آگاہ کیا۔ وزیراعظم نے گوادر سیف سٹی پروجیکٹ پر جلد از جلد عملی کام شروع کرنے کی بھی ہدایت کی تاکہ وہاں سیکیورٹی نظام کو مؤثر اور جدید خطوط پر استوار کیا جا سکے۔

وزیراعظم نے وزارتِ داخلہ کی کوششوں کو سراہتے ہوئے عوامی تحفظ کے لیے ہر ممکن اقدامات جاری رکھنے پر زور دیا۔

وزیرداخلہ کا ہیڈ کوارٹرز ایف سی نارتھ بلوچستان کا دورہ، شہداء کو خراجِ عقیدت

وفاقی وزیر داخلہ محسن نقوی نے فرنٹیئر کور بلوچستان نارتھ کے ہیڈ کوارٹرز کا دورہ کیا۔ وزیر داخلہ کے پہنچنے پر ایف سی کے چاق و چوبند دستے نے انہیں سلامی پیش کی۔

آئی جی ایف سی میجر جنرل عابد مظہر نے وزیر داخلہ کا افسران سے تعارف کرایا۔ اس موقع پر محسن نقوی نے یادگار شہداء پر حاضری دی، پھول چڑھائے اور فاتحہ خوانی کی۔

آئی جی ایف سی نے وزیر داخلہ کو فورس کی تربیت، پیشہ ورانہ صلاحیتوں اور آپریشنل تیاریوں سے متعلق تفصیلی بریفنگ دی۔

وزیر داخلہ نے شہداء کی قربانیوں کو خراجِ عقیدت پیش کرتے ہوئے کہا کہ ایف سی بلوچستان نارتھ نے قیامِ امن کے لیے جو خدمات انجام دی ہیں، وہ قابلِ ستائش ہیں۔ محسن نقوی کا کہنا تھا کہ فرنٹیئر کور بلوچستان نارتھ ایک مایہ ناز فورس ہے جس نے ہمیشہ ملک کے دفاع میں مثالی کردار ادا کیا۔

محسن نقوی نے کہا کہ ایف سی بلوچستان نارتھ کی قربانیاں ناقابلِ فراموش ہیں اور ”فتنہ الہند“ کے مذموم عزائم کو ناکام بنانے میں اس فورس نے تاریخ رقم کی ہے۔