بلوچستان کے ضلع قلات میں سیکیورٹی فورسز نے دہشت گردوں کے خلاف کامیاب آپریشن کرتے ہوئے فتنہ الہندوستان کے 8 دہشت گردوں کو ہلاک کردیا۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے 19 جولائی کو بلوچستان کے ضلع قلات میں خفیہ معلومات پر مبنی کامیاب آپریشن کے دوران بھارتی حمایت یافتہ دہشت گرد تنظیم ”فتنہ الہندوستان“ سے تعلق رکھنے والے 4 دہشت گردوں کو جہنم واصل کیا۔

اس آپریشن کے بعد 21 جولائی کو علاقے میں کلیئرنس اور سینیٹائزیشن آپریشن کیا گیا، جس کے دوران مزید 4 دہشت گردوں کو تلاش کر کے کامیابی سے ہلاک کر دیا گیا۔

آئی ایس پی آر کے مطابق آپریشن کے دوران دہشت گردوں کا ایک خفیہ ٹھکانہ بھی تباہ کیا گیا، جہاں سے بڑی تعداد میں جدید اسلحہ، گولہ بارود اور دھماکا خیز مواد برآمد ہوا۔

آئی ایس پی آر کے مطابق سیکیورٹی فورسز قوم کے عزم اور حوصلے کے ساتھ بلوچستان میں امن، ترقی اور استحکام کے دشمنوں کے خلاف بھرپور کارروائیاں جاری رکھے ہوئے ہیں، سیکیورٹی فورسز نے بھارتی سرپرستی میں سرگرم گروہوں کی بزدلانہ کارروائیوں کو ناکام بنا کر ایک مرتبہ پھر واضح کر دیا ہے کہ پاکستان کی سرزمین پر دہشت گردوں کے لیے کوئی جگہ نہیں۔

وزیراعظم کا سیکیورٹی فورسز کو خراج تحسین

وزیراعظم شہباز شریف نے قلات میں دہشت گردوں کے خلاف کامیاب آپریشن پر سیکیورٹی فورسز کو خراج تحسین پیش کیا ہے۔

وزیراعظم نے کہا کہ شہریوں کے تحفظ کے لیے دہشت گردوں کے مذموم عزائم کو خاک میں ملا دیں گے، ملکی سالمیت کے دشمن فتنہ الہندوستان کو جڑ سے اکھاڑ پھینکیں گے، حکومت دہشت گردی کے مکمل سد باب کے لیے پرعزم ہے۔

صدر مملکت کا سیکیورٹی فورسز کو خراج تحسین

صدرِ مملکت آصف علی زرداری نے بلوچستان میں سیکیورٹی فورسز کے کامیاب آپریشن پر خراجِ تحسین پیش کیا ہے۔

صدرِ مملکت نے کہا کہ سیکیورٹی فورسز نے ملک دشمن عناصر کو کیفرِ کردارتک پہنچایا، دہشت گردی کے خلاف جنگ میں قوم اپنی بہادر فورسز کے ساتھ کھڑی ہے، دہشت گرد امن و استحکام کو سبوتاژ کرنا چاہتے ہیں۔

آصف زرداری کا مزید کہنا تھا کہ قوم متحد ہے، دہشت گردی کو ہر صورت ناکام بنایا جائے گا، دہشت گردی کے مکمل خاتمے تک کارروائیاں جاری رہیں گی۔

وزیر داخلہ کا سیکیورٹی فورسز کو خراج تحسین

وزیرداخلہ محسن نقوی نے قلات میں کامیاب آپریشن پر سیکیورٹی فورسز کو خراج تحسین کیا اور فورسز کی پیشہ وارانہ صلاحیتوں کو سراہا۔

محسن نقوی نے کہا کہ دہشت گردوں کو جہنم واصل کرنے پر سکیورٹی فورسز کو سلام کرتا ہوں، ملک سے فتنہ الہندوستان کے ایک ایک دہشت گرد کا صفایا کریں گے۔