تہران میں وزیرداخلہ محسن نقوی نے سہ ملکی کانفرنس سے خطاب کرتے ہوئے کہا کہ تہران میں سہ ملکی کانفرنس کا انعقاد خوش آئند ہے، ہمارے لیے ایران اورعراق میں موجود زائرین اہم ترین ہیں، ہم ایران کو دفاعی حق کے استعمال پر مکمل سپورٹ کرتے ہیں، ہم آئندہ بھی ایران کے ساتھ کھڑے رہیں گے، وزیراعظم شہباز شریف اور دیگر آفیشلز نے اپنا کردار ادا کیا۔ کانفرنس میں فیصلہ کیا گیا کہ زائرین کی سہولت کیلئے پاکستان، ایران اور عراق کا مشترکہ ورکنگ گروپ تشکیل دیا جائے گا-

ایران کے دارالحکومت تہران میں پاکستان، ایران اور عراق کے وزرائے داخلہ کی زائرین کے لیے سہ ملکی کانفرنس منعقد ہوئی جس میں ایران اور عراق جانے والے زائرین کی سہولت کیلئے ہر ممکن اقدام پر اتفاق کیا گیا ۔ کانفرنس میں فیصلہ کیا گیا کہ زائرین کی سہولت کیلئے پاکستان۔ ایران اور عراق کا مشترکہ ورکنگ گروپ تشکیل دیا جائے گا-

سہ ملکی کانفرنس سے خطاب کرتے ہوئے وفاقی وزیرداخلہ محسن نقوی نے کانفرنس کے انعقاد کو خوش آئند قرار دیا ہے۔ انہوں نے کہا کہ ایران اور عراق میں موجود پاکستانی زائرین ہمارے لیے نہایت اہمیت رکھتے ہیں اور ان کی سہولت و سلامتی ہماری اولین ترجیح ہے۔

محسن نقوی نے کانفرنس کے انعقاد پر ایران اور عراق کی حکومتوں کا شکریہ ادا کرتے ہوئے ایران کو حالیہ عظیم کامیابی پر مبارکباد پیش کی۔ ان کا کہنا تھا کہ پاکستان نے ایران پر حملے کی کھل کر مذمت کی ہے اور ہم ایران کے دفاعی حق کی مکمل حمایت کرتے ہیں۔

انہوں نے مزید کہا کہ پاکستانی عوام مشکل وقت میں ایرانی عوام کے شانہ بشانہ کھڑے رہے اور آئندہ بھی ایران کے ساتھ کھڑے رہیں گے۔ وزیرداخلہ نے کہا کہ وزیراعظم شہباز شریف اور دیگر آفیشلز نے اپنا کردار ادا کیا۔

سہ ملکی کانفرنس سے خطاب میں انھوں نے مزید کہا کہ سفیر ایران امیری ہماری کوششوں کے گواہ ہیں، پاکستان نے ایران کیلئے ہر فورم پر آواز اٹھائی، عراق کو بھی مکمل تعاون کی یقین دہانی کراتے ہیں، زائرین کے معاملے پر صرف رجسٹرڈ گروپس کے ذریعےعمل کیا جائے گا۔

ان کا کہنا تھا کہ زائرین گروپ کے سربراہ یقینی بنائیں گے کہ تمام زائرین واپس آئیں، کسی کو بھی غیر قانونی طریقے سے ایران ، عراق جانے کی اجازت نہیں دیں گے، پاکستانی زائرین کی دیکھ بھال کرنے پر ایران اور عراق کا شکریہ ادا کرتے ہیں۔

ایران اور عراق کے حکام نے بھی مشترکہ نیوزکانفرنس کی، ایرانی وزیر داخلہ نے کہا کہ زائرین کے حوالے سے سہ فریقی کانفرنس کا انعقاد اور زائرین کو سہولیات دینے پرتبادلہ خیال کیا گیا۔

قبل ازیں، وفاقی وزیر داخلہ محسن نقوی نے تہران میں ایرانی ہم منصب سے ملاقات کی جس میں باہمی دلچسپی کے امور اور پاک ایران تعلقات پر تبادلہ خیال کیا گیا۔