محکمہ موسمیات کے مطابق شہرِ کراچی میں آج مطلع جزوی طور پر ابر آلود اور موسم مرطوب ہے۔ رات کے وقت ہلکی بارش یا بوندا باندی کا امکان ظاہر کیا گیا ہے، جس سے موسم کچھ حد تک خوشگوار ہو سکتا ہے۔

محکمہ موسمیات کے مطابق کراچی کا موجودہ درجہ حرارت 30 ڈگری سینٹی گریڈ ریکارڈ کیا گیا ہے، تاہم گرمی کی شدت 35 ڈگری تک محسوس کی جا رہی ہے۔ آئندہ 24 گھنٹوں میں زیادہ سے زیادہ درجہ حرارت 35 اور کم سے کم 28 ڈگری سینٹی گریڈ رہنے کا امکان ہے۔ شہر میں جنوب مغربی سمت سے 16 کلومیٹر فی گھنٹہ کی رفتار سے ہوائیں چل رہی ہیں، جب کہ ہوا میں نمی کا تناسب 77 فیصد ریکارڈ کیا گیا ہے۔

فضائی معیار کی نگرانی کرنے والے ادارے اے کیو آئی کے مطابق کراچی کی فضا اس وقت تسلی بخش ہے۔ ہوا میں آلودہ ذرات کی مقدار 63 پرٹیکیولیٹ میٹر ریکارڈ کی گئی ہے، جو عام شہریوں کے لیے کسی خطرے کا باعث نہیں۔

دوسری جانب خیبرپختونخوا کے مختلف علاقوں میں بارش کی پیشگوئی کی گئی ہے۔ محکمہ موسمیات کے مطابق آئندہ 24 گھنٹوں کے دوران بالائی علاقوں میں بارش کا امکان ہے، جب کہ میدانی علاقوں میں رات کے وقت کہیں کہیں ہلکی بارش متوقع ہے۔

پشاور میں دن کے وقت موسم گرم اور مرطوب رہنے کا امکان ہے۔ محکمہ موسمیات نے بتایا ہے کہ گزشتہ روز صوبے میں سب سے زیادہ درجہ حرارت بنوں میں 40 ڈگری سینٹی گریڈ ریکارڈ کیا گیا۔

محکمہ موسمیات نے شہریوں کو ہدایت کی ہے کہ مرطوب موسم کے پیش نظر خود کو ہائیڈریٹ رکھیں اور غیر ضروری دھوپ سے بچنے کی کوشش کریں، جب کہ بارش کی صورت میں نکاسی آب اور ٹریفک صورتحال سے متعلق ضلعی انتظامیہ سے رابطے میں رہیں۔

علاوہ ازیں، محکمہ موسمیات کے مطابق اسلام آباد اور گردونواح میں شام یا رات کے وقت تیز ہواؤں اور گرج چمک کے ساتھ بارش متوقع ہے۔ راولپنڈی، مری، اٹک، چکوال اور گوجرانوالہ میں بھی اسی نوعیت کی بارش کا امکان ظاہر کیا گیا ہے۔

پنجاب کے شمال مشرقی علاقوں اور خطہ پوٹھوہار میں موسلا دھار بارش کی پیشگوئی کی گئی ہے، جب کہ لاہور، سیالکوٹ، سرگودھا اور فیصل آباد کے نشیبی علاقوں میں بارش کے باعث پانی جمع ہونے کا خدشہ ہے۔

گلگت بلتستان میں شام کے وقت گرج چمک کے ساتھ بارش کی توقع کی جا رہی ہے۔ بلوچستان کے علاقوں بارکھان، ژوب، موسیٰ خیل اور سبی میں بھی تیز ہواؤں اور بارش کا امکان ہے۔

محکمہ موسمیات کا کہنا ہے کہ سندھ کے کچھ حصوں، خصوصاً سکھر، شکارپور، کشمور اور لاڑکانہ میں بھی چند مقامات پر بارش ہو سکتی ہے۔

محکمہ موسمیات نے خبردار کیا ہے کہ مختلف علاقوں میں آنے والی آندھی اور بارش کے باعث کمزور ڈھانچوں اور خستہ حال عمارتوں کو نقصان پہنچ سکتا ہے۔ شہریوں کو ہدایت کی گئی ہے کہ وہ احتیاطی تدابیر اختیار کریں اور غیر ضروری طور پر کھلے مقامات یا بجلی کے کھمبوں کے قریب نہ جائیں۔