ضلع کرم کی تحصیل وسطی کرم کے علاقے گوندال میں ایک پک اپ گاڑی نہر میں جاگری، افسوسناک حادثے کے نتیجے میں 7 افراد جاں بحق اور 3 افراد زخمی ہو گئے۔

پولیس کے مطابق حادثہ اس وقت پیش آیا جب گاڑی سنٹرل کرم سے لوئر کرم جا رہی تھی۔ مقامی ذرائع کا کہنا ہے کہ گاڑی اچانک بے قابو ہو کر نہر میں جا گری، جس کے بعد امدادی کارروائیاں شروع کر دی گئیں۔

پولیس کے مطابق تمام 7 جاں بحق افراد کی لاشیں نکال لی گئی ہیں جبکہ زخمیوں کو تحصیل ہیڈ کوارٹر اسپتال صدہ منتقل کر دیا گیا ہے۔