ملک بھر میں آٹھ محرم الحرام کے موقع پر عزاداری کے سلسلے میں جلوسوں کا سلسلہ جاری ہے۔ کراچی میں آٹھ محرم الحرام کا مرکزی جلوس نشتر پارک سے برآمد ہوا ۔ پشاور سے آج 18 چھوٹے بڑے ماتمی جلوس برآمد ہوں گے، جبکہ اسلام آباد میں بھی مرکزی جلوس جامعہ المرتضیٰ جی نائن فور سے روانہ ہوگا۔

کراچی میں آٹھ محرم الحرام کا مرکزی جلوس ایک بجے نشتر پارک سے برآمد ہوا،مرکزی جلوس کی سیکیورٹی کیلئے فول پروف انتظامات کئے گئے ہیں، جلوس روایتی راستوں سے ہوتا ہوا قدیمی امام بارگاہ بارہ امام پر قیام کرے گا، علم پر پھولوں کی تبدیلی کے بعد جلوس حسینیہ ایرانیاں امام بارگاہ پہنچے گا۔

پولیس کےمطابق سندھ رینجرز اور پولیس کے دستے جلوس کے آگے چلیں گے،جلوس کی گزرگاہوں کو کنٹینر رکھ کر سیل کر دیا گیارینجرز اور پولیس کے سراغ رساں کتوں کی مدد سے گزرگاہوں کی سوپئنگ کی جائیگی، بم ڈسپوزل اسکواڈ بھی جلوس کی گزرگاہوں پر سوئپنگ کرے گا۔

پولیس حکام کا مزید کہنا تھاکہ قانون نافذ کرنے والے اداروں کی کلیئرنس کے بعد جلوس کو آگے بڑھایا جائے گا، سی ٹی ڈی سمیت دیگر اداروں کے اہلکار بھی جلوس کی نگرانی کیلئے تعینات کئے جائیں گے، کمانڈ اینڈ کنٹرول روم میں اے این پی آر کیمروں کی مدد سے جلوس کی نگرانی کی جائے گی، ماہر نشانہ باز اہلکار بلند و بالا عمارتوں پر تعینات کردیے گئےہیں ۔آٹھ محرم کا جلوس حسینیہ ایرانیاں امام بارگاہ کھارادر پر اختتام پذیر ہوگا ۔

پشاور میں 8 محرم الحرام کا جلوس

پشاور شہر میں آج آٹھ محرم الحرام کے سلسلے میں 18 چھوٹے بڑے جلوس برآمد ہوں گے۔ جلوسوں کے روایتی راستوں پر سیکیورٹی کے انتہائی سخت انتظامات کیے گئے ہیں، جبکہ جلوسوں کی نگرانی جدید ڈرون کیمروں کے ذریعے کی جائے گی۔**

پولیس کے مطابق پہلا جلوس امام گاہ سید نجف علی شاہ سے سہ پہر 3 بجے برآمد ہوگا، جبکہ دوسرا بڑا جلوس شام 4 بجے حسینیہ ہال پشاور صدر سے روانہ ہوگا۔

اس کے علاوہ جلوسِ شبیہ جھولا رات 8 بجے امام بارگاہ حسین محلہ مروی ہا سے برآمد ہوگا، جو مقررہ راستوں سے ہوتا ہوا اپنی منزل پر اختتام پذیر ہوگا۔

پولیس اور سیکیورٹی اداروں نے جلوسوں کے روٹس پر سیکیورٹی کے فول پروف انتظامات کیے ہیں۔ داخلی و خارجی راستوں پر چیکنگ، واک تھرو گیٹس، بم ڈسپوزل اسکواڈ کی تعیناتی کے ساتھ ساتھ فُل مانیٹرنگ کے لیے ڈرون کیمرے بھی استعمال کیے جا رہے ہیں۔

اسلام آباد میں 8 محرم الحرام کا جلوس

اسلام آباد میں آٹھ محرم الحرام کے موقع پر جامعہ المرتضیٰ، جی نائن فور سے مرکزی جلوس برآمد ہوا، جو اپنے مقررہ راستوں سے ہوتا ہوا جامعہ الصادق، جی نائن ٹو پر اختتام پذیر ہو گا۔

جلوس کا روٹ جی نائن ون، پولیس کوارٹر، اور سروس روڈ پر محیط ہوگا۔ اس دوران روہتاس روڈ (پولیس کوارٹر ٹرن)، طفیل نیازی روڈ (جی ٹین) اور خرم روڈ کو ٹریفک کے لیے بند کر دیا جائے گا۔

انتظامیہ اور ٹریفک پولیس نے شہریوں سے اپیل کی ہے کہ وہ متبادل راستے استعمال کریں اور جلوس کے دوران ٹریفک کی روانی برقرار رکھنے میں انتظامیہ سے تعاون کریں۔

سیکیورٹی کے سخت انتظامات کیے گئے ہیں، جبکہ حساس مقامات پر پولیس، رینجرز اور رضا کاروں کی نفری تعینات کی گئی ہے۔ جلوس کے روٹ پر نگرانی کے لیے سی سی ٹی وی کیمرے بھی فعال کر دیے گئے ہیں۔