پاکستان تحریک انصاف کے مرکزی سیکرٹری اطلاعات شیخ وقاص اکرم نے زراعت دشمن پالیسیوں پر کڑی تنقید کرتے ہوئے کہا ہے کہ حکومت کی غلط پالیسیوں نے آج نفع بخش فصلوں کو شدید بحران سے دوچار کردیا، کسانوں کو نظر انداز کرکے معیشت کی ریڑھ کی ہڈی کو توڑا جارہا ہے، موجودہ بجٹ دراصل کسان دشمن بجٹ ہے، جسے کسی صورت قبول نہیں کیا جا سکتا۔

اسلام آباد میں پریس کانفرنس کرتے ہوئے پی ٹی آئی سیکرٹری اطلاعات شیخ وقاص اکرم نے کہا کہ اس بجٹ میں کسان پیکج نہیں رکھا گیا، کسان کو کھاد ٹریکٹر کی سہولیات فراہم نہیں کی گئی، ملک میں زراعت کی گروتھ کم ہو رہی ہے، جو کسان دشمن ہے وہ درحقیقت پاکستان کا دشمن ہے، کپاس کی پیداوار میں 34 فیصد کمی ہوئی ہے، ملک میں کسانوں کو چیلنجز کا سامنا ہے۔

شیخ وقاص اکرم نے کہا کہ مکئی کی پیداوار 14 فیصد نیچے چلی گئی، گندم کی پیداوار میں کمی آئی ہے، اس وقت ملک میں زراعت کو چیلنجز کا سامنا ہے، حکومت اکنامک سروے میں جھوٹ بول رہی ہے، ملک میں زراعی بحران پیدا ہورہا ہے، زراعی بحران کی وجہ کسان دشمن پالیسیاں ہیں، اس وقت لینڈ مافیہ کو فروغ دیا جا رہا ہے، کسانوں کو مسلسل نظر انداز کیا جا رہا ہے۔

انہوں نے مزید کہا کہ زراعت کے شعبوں میں اربوں روپے کا نقصان ہو رہا ہے، ہم پوچھتے ہیں اس اربوں روپے کے نقصان کا ذمہ دار کون ہے، ایک وقت تھا ہم کپاس کی برآمدات پر فخر کرتے تھے، آج کپاس بھی بحران کا شکار ہے، وزیر خزانہ سرکاری ملازمین کوبیٹھا کر پریس کانفرنس کر رہے تھے، گنے کی فصل بھی بحران کا شکار ہے۔

پی ٹی آئی رہنما کا کہنا تھا کہ ملک میں آم کی پیداوار میں 75 فیصد کمی ہوئی ہے، زراعت کی گروتھ 6.2 سے کم ہوکر 0.5 ہوگئی، اب دیکھنا ہوگا کہ کسان کہ لاگت کیا آہی ہے، حکومت کو دیکھنا ہوگا کسان کیا بچا رہا ہے، ٹریکٹر کی پروڈکشن میں کمی آگئی ہے، کم پروڈکشن کی وجہ سےٹریکٹر قیمت میں اضافہ ہورہا ہے، آج غریب کسان ٹریکٹر کو کیسے خرید سکتا ہے، آج ٹریکٹر کی قیمت 5 ملین سے زیادہ ہے، کسان ٹریکٹر، کھاد، پانی دیگر چیزیں کیسے اکیلا دیکھ سکتا ہے۔

پی ٹی آئی سیکرٹری اطلاعات شیخ وقاص اکرم نے مزید کہا کہ نہروں کی صفائی نہیں کی جارہی ہے، آبپاشی کا نظام خراب کردیا گیا ہے، سیڈ پالیسی ابھی تک منظور نہیں ہوئی، یہ بجٹ کسان دشمن بجٹ ہے۔