بانی پاکستان تحریک انصاف (پی ٹی آئی) نے 9 مئی کے مقدمات کی تفتیش کے سلسلے میں پولی گرافک ٹیسٹ کرانے اور وکلا کی عدم موجودگی میں تفتیش میں شامل ہونے سے انکار کر دیا۔

تفصیلات کے مطابق پنجاب پولیس کی تفتیشی ٹیم راولپنڈی کی اڈیالہ جیل پہنچی جہاں انہوں نے 9 مئی کے واقعات میں بانی پی ٹی آئی سے تحقیقات کرنے کی کوشش کی۔

ذرائع کا کہنا ہے کہ بانی پی ٹی آئی نے مؤقف اپنایا کہ ان کے وکلا کی غیر موجودگی میں کسی بھی قسم کی تفتیش میں شامل نہیں ہوں گے۔ اس موقع پر پولیس ٹیم کی سربراہی ڈی ایس پی آصف جاوید کر رہے تھے، جبکہ ٹیم میں انسپکٹر محمد اسلم، محمد عالم، محمد ارحم اور پنجاب فرانزک یونٹ کے عابد ایوب بھی شامل تھے۔

عدالت نے عمران خان کا پولی گرافک اور فوٹو گرامیٹک ٹیسٹ کروانے کی اجازت دے دی

یاد رہے کہ 9 مئی کے پرتشدد واقعات کے بعد بانی پی ٹی آئی سمیت دیگر پارٹی رہنماؤں کے خلاف مختلف مقدمات درج کیے گئے تھے، جن کی تحقیقات جاری ہیں۔ پولیس حکام کا کہنا ہے کہ وہ قانون کے مطابق اگلے اقدامات پر غور کر رہے ہیں۔

عمران خان کے پولی گرافک سمیت دیگر ٹیسٹ کی اجازت دینے کا تحریری فیصلہ جاری

واضح رہے کہ 9 مئی کے مقدمات میں پولیس نے عمران خان کا پولی گرافک اور فوٹوگرافک ٹیسٹ کرانے کا فیصلہ کیا تھا جس کے لیے پراسیکیوشن نے انسداد دہشتگردی عدالت میں باقاعدہ درخواست جمع کروائی تھی۔لاہورکی انسدادِ دہشت گردی عدالت نے تمام فریقین کے مؤقف سننے کے بعدعمران خان کا پولی گرافک ٹیسٹ کروانے کی اجازت دی تھی۔

یاد رہے کہ 9 مئی 2023 کو ملک بھر میں فوجی تنصیبات اور سرکاری املاک پر حملوں کے سلسلے میں پی ٹی آئی قیادت کے خلاف کئی مقدمات درج کیے گئے تھے، جن میں بانی پی ٹی آئی کو مرکزی کردار کے طور پر نامزد کیا گیا ہے۔