وزیرخزانہ محمد اورنگزیب نے کہا ہے کہ سرمایہ کاروں کا معیشت کی بحالی پر اعتماد خوش آئند ہے، اسٹاک مارکیٹ کی نفسیاتی حدیں بحال ہونے پرمبارکباد پیش کرتا ہوں۔

پاکستان کے پہلے گرین سکوک بانڈ کے اجرا کی تقریب کے دوران ویڈیو لنک سے خطاب کرتے ہوئے وزیر خزانہ محمد اورنگزیب نے کہا کہ سرمایہ کاروں کا معیشت کی بحالی پر اعتماد خوش آئند ہے، آج ملک بھر میں یوم تشکر جوش و جذبے سے منایا جا رہا ہے۔

وزیر خزانہ نے کہا کہ اسٹاک مارکیٹ کی نفسیاتی حدیں بحال ہونے پر مبارکباد پیش کرتا ہوں، اسٹاک مارکیٹ گزشتہ روز بلند ترین سطح پر بند ہوئی۔

محمد اورنگزیب نے بتایا کہ واشنگٹن اور لندن میں سرمایہ کاروں سے ملاقاتیں ہوئیں، دنیا پاکستان کے مائیکرو اکنامک استحکام سے مطمئن ہے۔

انہوں نے مزید کہا کہ پاکستان کا پہلا سکوک بانڈ لانچ کر رہے ہیں، بجٹ پر کام جاری ہے، اسٹیک ہولڈرز سے مشاورت ہو رہی ہے، وہ بجٹ تجاویز پیش کر رہے ہیں، پاکستان کے لیے ماحولیاتی تبدیلی ایک خطرہ بن چکی ہے، ماحولیاتی اثرات سے نمٹنے کے لیے فنانسنگ پر کام جاری ہے۔