وزیراعلیٰ پنجاب مریم نواز نے بھارتی جارحیت کا منہ توڑ جواب دینے پر مسلح افواج کو خراج تحسین پیش کرتے ہوئے کہا کہ وردی کو ڈنڈے پر لٹکا کر مذاق اڑایا گیا، آج یہی وردی پوش جوان سرحدوں پر ہماری حفاظت کے لیے لڑ رہے ہیں، 9 مئی کو جس ائیرفورس کے جہازوں کو جلایا گیا اسی ائیرفورس نے رافیل طیارے گرائے، نواز شریف کا جملہ یاد رکھنا چاہیےکہ ہم 9 مئی والے نہیں 28 مئی اور 10 مئی والے ہیں۔

جی سی یونیورسٹی فیصل آباد میں لیپ ٹاپ اور ہونہار اسکالرشپ فیز ٹو کی تقریب سے خطاب کرتے ہوئے وزیراعلیٰ پنجاب مریم نواز نے کہا کہ پاکستان کو دنیا کی سب سے بڑ ی قوت اورطاقت بنانا چاہتے ہیں، سب کی نیت ٹھیک تھی تو پاکستان کو تاریخی فتح ملی، اگرعوام تقسیم اور قیادت متحد نہ ہوتی تو دشمن کے خلاف تاریخی فتح حاصل نہیں کرسکتے تھے۔

مریم نواز نے کہا کہ تاریخی فتح نے قوم کو متحد اور یکجان بنا دیا، کامیابی پر فخر نہیں، عاجزی اور اللہ تعالیٰ کا شکر ادا کرتے ہیں، آج میرا اورہم سب کا سر فخر سے بلند ہے، ہر لحاظ سے بڑے دشمن سے سامنا تھا، مقابلہ کیا اور افواج پاکستان نے جنگ لڑی اور پوری قوم ان کے ساتھ کھڑی تھی۔

وزیراعلیٰ پنجاب کا کہنا تھا کہ ہم نے صرف جنگ ہی نہیں جیتی، قوم کا روشن مستقبل یقینی بنایا، میں باربار بچوں کوتفریق کرنے والوں کے بارے میں بتاتی رہی، میں بچوں سے پہلے بھی کہتی رہی، آج بھی کہتی ہوں کہ نفرت اور تقسیم پھیلانے والوں کی باتوں میں نہیں آنا۔

انہوں نے مزید کہا کہ ہر نوجوان کا قدم ملک و قوم کی سلامتی کے لیے ہونا چاہیئے، سارے ادارے ہمارے اپنے ہیں، لوگ ہمارے اپنے ہیں، اندھی نفرت کا شکار نہیں ہونا چاہیئے، وطن کا مستقبل طلبہ کے ہاتھ میں ہے۔

وزیراعلیٰ پنجاب مریم نواز نے کہا کہ وردی کو ڈنڈے پر لٹکا کر مذاق اڑایا گیا، آج یہی وردی پوش جوان سرحدوں پر ہماری حفاظت کے لیے لڑ رہے ہیں، بچوں کا جذبہ دیکھ کر دل کو تسلی، اطمینان اور مسرت ہوتی ہے، اپنے طلبہ پر فخر ہے۔

تقریب سے خطاب کے دوران مریم نواز نے مزید کہا کہ جنگ جیتنے سے بڑا خوشی کا لمحہ کوئی نہیں ہوسکتا، بچوں سے کہتی ہوں کہ کسی کے اقتدار کی ہوس کا شکار نہ بنیں اور پاکستان کے نوجوانوں نے نفرت کی سیاست کو مسترد کردیا۔

انہوں نے کہا کہ جب مشکل گھڑی آتی ہے تو قوم کے بیٹے سینہ تان کر کھڑے ہوتے ہیں، ملک کے مستقبل کے بارے میں شک و شبہات پیدا کرنے والے شرمندہ ہوئے۔

مریم نواز کا کہنا تھا کہ 9 مئی کو جس ائیرفورس کے جہازوں کو جلایا گیا اسی ائیرفورس نے رافیل طیارے گرائے، انڈیا کہتا تھا کہ رافیل طیارہ گرایا نہیں جا سکتا، ہم نے جے ایف تھنڈر سے گرا کر دیکھا دیا۔

وزیراعلیٰ پنجاب نے کہا کہ قوم کو یقیناً یاد ہوگا، جے ایف تھنڈر کس نے بنایا تھا، نوازشریف نے کہا تھا کہ ہم 9مئی والے نہیں 28 مئی والے ہیں، آج نوجوانوں کا جوش و خروش بتا رہا ہے، ہم 9مئی والے نہیں 10 اور28 مئی والے لوگ ہیں۔

انہوں نے مزید کہا کہ 1998 میں لوگ نوازشریف کو ایٹمی دھماکے کا جواب نہ دینے کا کہہ رہے تھے، لوگوں نے نوازشریف کو ایٹمی دھماکے پر پابندیاں لگنے سے ڈرایا لیکن نوازشریف نے کہا کہ دھماکے ضرور کروں گا، میرے وطن کی سلامتی اور دفاع کا معاملہ ہے۔

مریم نواز کا کہنا تھا کہ 28مئی کو ہم نے مقابلہ 5 اور 6 سے جیتا تھا، 10مئی کو مقابلہ 6 زیرو سے جیتا ہے، مجھے یقین ہے کہ میرے بیٹے اور بیٹیاں 10مئی کے جانشین ہیں، سبز ہلالی پرچم نہیں گرنے دیں گے۔

وزیراعلیٰ پنجاب نے کہا کہ فضائیہ کے شاہینوں نے قوم کا سر فخر سے بلند کر دیا، فیصل آباد کے 12ہزار طلبہ کی طرف سے وزیراعظم شہبازشریف، آرمی چیف جنرل عاصم منیر، ایئر چیف ظہیر بابر سندھو کو مبارک باد پیش کرتی ہوں۔

انہوں نے کہا کہ جنگ میں زخمی ہونے والے شہریوں اور جوانوں کی دیکھ بھال کرنے پر سب کو دل کی گہرائیوں سے خراج تحسین اور شاباش پیش کرتی ہوں، شہدا اور غازیوں کی بے مثال خدمت اور دیکھ بھال کرنے والو ں کو بھی خراج تحسین پیش کرتی ہوں۔