بھارت کی جانب سے پاکستان کی تین ایئر بیسز پر حملے اور ڈرون حملوں کے بعد پاکستان نے جوابی کارروائی کرتے ہوئے بھارت کے خلاف ”آپریشن بُنْيَانٌ مَّرْصُوْص“ کا آغاز کردیا۔ سیکیورٹی ذرائع کے مطابق ہفتے کی شام 5 بجے سے اب تک بھارت کو شدید نقصان اٹھانا پڑا ہے، جس میں اس کی کئی تنصیبات مکمل طور پر تباہ ہو چکی ہیں۔

پاکستانی سیکیورٹی ذرائع کے مطابق بھارت کو جو نقصانات اٹھانے پڑے ان میں روسی ساختہ جدید ترین S-400 میزائل ڈیفنس سسٹم، چار ایئربیسز اور براہموس میزائلوں کی دو اسٹوریج سائٹس شامل ہیں۔

ترجمان پاک فوج کے مطابق آپریشن کا نام قرآن کی ایک آیت سے لیا گیا ہے، جس کا مفہوم ہے: ”یقیناً اللہ اُن لوگوں سے محبت کرتا ہے جو اُس کے راستے میں صف بستہ ہو کر ایسے لڑتے ہیں جیسے وہ سیسہ پلائی دیوار ہوں۔“ ”بُنْيَانٌ مَّرْصُوْص“ کا مطلب ہے سیسے کی دیوار یا مضبوط کنکریٹ جیسا ڈھانچہ، جیسا کہ تجزیہ کار طارق چوہدری نے ”آج نیوز“ کو بتایا۔

بھارت کے نقصانات

پاکستانی سیکیورٹی ذرائع کی تصدیق اور بھارتی میڈیا کی بالواسطہ رپورٹوں کے مطابق بھارت کو درج ذیل عسکری نقصانات اٹھانے پڑے:

• میزائل ڈیفنس سسٹم: بھارت کا S-400 میزائل ڈیفنس سسٹم گجرات کے بھُج علاقے اور ادھم پور میں تباہ کیا گیا۔ ایک S-400 بیٹری میں کئی گاڑیاں اور ریڈار شامل ہوتے ہیں اور اس کی مالیت ڈیڑھ ارب ڈالر ہے۔ بھارت نے روس سے کل پانچ بیٹریز خریدی تھیں۔

• میزائل اسٹوریج سائٹس: بیاس میں واقع ایک براہموس میزائل اسٹوریج سائٹ کو پاکستان نے تباہ کیا۔ دوسری سائٹ ناگروٹا (جموں کے قریب) میں نشانہ بنائی گئی۔

• آٹھ ایئربیسز: پاکستانی حملوں میں برنالہ، جموں، پٹھان کوٹ، ادھم پور، جالندھر، مامون، اکھنور اور گُجرات کی ایئربیسز کو نشانہ بنایا گیا۔

• پانچ ایئرفیلڈز: پاکستان نے ہلوارا، آدم پور اور بٹھنڈہ (پنجاب)، سرسہ (ہریانہ) اور نالیا (گجرات) میں واقع ایئرفیلڈز کو بھی تباہ کر دیا۔

• سی پورٹ: گجرات کے کنڈلا سی پورٹ پر پاکستانی ڈرون حملے سے شدید تباہی پھیلائی گئی۔

• دہشت گردی کا کیمپ: راجوڑی میں واقع ایک بھارتی دہشت گرد کیمپ بھی نشانہ بنایا گیا، جو سیکیورٹی ذرائع کے مطابق بھارتی ملٹری انٹیلیجنس چلا رہی تھی اور پاکستان میں دہشت گردی کے لیے استعمال ہو رہا تھا۔ سیکیورٹی ذرائع کا کہنا ہے کہ یہ تمام عسکری اور سیکیورٹی تنصیبات پاکستان کے عام شہریوں، بشمول بچوں، پر حملے کرنے کے لیے استعمال ہو رہی تھیں۔

• بھارتی بریگیڈ ہیڈکوارٹر کے جی ٹاپ تباہ

• سپلائی ڈپو اڑی تباہ کر دیا گیا

• مقبوضہ کشمیرمن کوٹ اور دہرنگیاری میں بھارتی فوج کی آرٹلری گن پوزیشن تباہ

• لائن آف کنٹرول پر بھارتی پوسٹیں تباہ پھکلیاں سیکٹر، ربتانوالی پوسٹ، ڈنہ پوسٹ، خواجہ بھیک کمپلیکس اور رنگ کنٹوئر بالمقابل سنکھ مکمل تباہ کردی گئیں، افواج پاکستان کی توپوں نے بھارتی توپوں کو خاموش کرا دیا۔ ہیڈمرالہ میں بھی بجوات سیکٹر میں پاک فوج نے انڈین چوکیاں تباہ کردیں۔ ربتانوالی پوسٹ، جزیرہ پوسٹ کمپلیکس، کافر مہری، شاہپر 3 اور غدر ٹاپ کو بھی مکمل تباہ کردیا گیا۔

• افواجِ پاکستان کی جانب سے لائن آف کنٹرول پر بھارتی جارحیت کا بھرپور اور منہ توڑ جواب جاری ہے، سیکیورٹی ذرائع کے مطابق پاکستانی توپ خانے نے متعدد بھارتی چیک پوسٹوں کو نشانہ بنا کر انہیں تباہ کر دیا، جبکہ پاک فوج کی 12.7 ملی میٹر گنز دشمن پر مسلسل آگ برسا رہی ہیں۔ ان گنز کی بمباری سے بھارتی توپیں خاموش ہو گئیں اور دشمن کو بھاری نقصان اٹھانا پڑا۔ سیکیورٹی ذرائع کا کہنا ہے کہ پاکستانی افواج نے بھارتی فوج کی کمر توڑ دی ہے۔

• پاکستان میں بھارت کے مزید نو ڈرونز مار گرائے گئے۔ سرگودہا میں پانچ بھارتی ڈرونز مار گرائے گئے، لاہور کے سندر انڈسٹریل اسٹیٹ میں ایک بھارتی ڈرون مار گرایا گیا جبکہ بہاولنگر کے علاقے منچن آباد کے قریب بھی ایک بھارتی ڈرون مار گرایا گیا۔ ایک ایک ڈرون راجن پور اور اوکاڑہ میں گرایا گیا۔

رافیل طیارہ اور ڈرون

سیالکوٹ کے قریب ایک بھارتی رافیل طیارہ مار گرائے جانے کی غیر مصدقہ اطلاعات ہیں، تاہم سیکیورٹی ذرائع نے ان کی تصدیق نہیں کی۔ دوسری جانب سیالکوٹ میں ایک بڑے بھارتی ڈرون کو مار گرائے جانے کی اطلاعات ہیں۔

پاکستانی ڈرونز دہلی اور گجرات کی فضاؤں میں

اطلاعات ہیں کہ پاکستانی ڈرونز بھارتی دارالحکومت نئی دہلی اور وزیراعظم نریندر مودی کی ریاست گجرات کی فضاؤں میں پرواز کرتے دیکھے گئے۔

بھارتی ذرائع سے تصدیق

بھارتی خبررساں ایجنسی ”اے این آئی“ کی جانب سے جاری کردہ ایک ویڈیو میں ادھم پور ایئربیس سے دھواں اٹھتے دیکھا جا سکتا ہے، جو فاصلے سے فلمایا گیا۔

بھارتی نیوز چینل ”TV9“ نے سرسہ ایئرفیلڈ پر نقصانات کی تصدیق کی، اور بتایا کہ ایئرفیلڈ پر دھماکوں کی آوازیں سنی گئیں۔ سرسہ، ہریانہ کے بھٹنڈہ ایئربیس کے قریب واقع ہے۔

بھارتی میڈیا نے پٹھان کوٹ ائر بیس، پونچھ اور جموں ائر بیس پر پاکستانی حملوں کا بھی اعتراف کرلیا۔

بھارت کے کئی سوشل میڈیا صارفین نے بھی نئی دہلی کی فضاؤں میں پاکستانی ڈرونز کی موجودگی کی تصدیق کی۔

فَتح-1 میزائل

پاکستان نے اس آپریشن میں “فَتح-1 میزائل استعمال کیا، جس کی رینج 120 کلومیٹر ہے۔ پاکستانی افواج نے حالیہ دنوں میں اس میزائل کا تربیتی تجربہ بھی کیا تھا۔

فتح 1 وہی میزائل ہے جس کے اپگریڈڈ ورژن کا پاکستان نے چند دن پہلے ہی ٹیسٹ کیا تھا۔ فتح گائیڈڈ میزائل سسٹم جدید نیوی گیشن سسٹم سے لیس ہے اور کسی بھی میزائل ڈیفنس سسٹم کو مات دینے کی صلاحیت رکھتا ہے۔ فتح ٹو میزائل انتہائی درستگی کے ساتھ اہداف کو نشانہ بنا سکتا ہے۔

افواج کی جانب سے جاری کی گئی ایک ویڈیو میں فجر کے وقت فَتح میزائل کو ملٹی بیرل لانچر سے فائر کرتے ہوئے دکھایا گیا، جبکہ دوسری ویڈیو میں دن نکلنے کے بعد میزائل فائرنگ کے مناظر دکھائے گئے۔

طارق چوہدری نے بتایا کہ پاکستان اُن جگہوں کو نشانہ بنا رہا ہے جہاں سے بھارتی میزائل حملے کیے گئے، تاہم انہوں نے ان مقامات کا نام لینے سے گریز کیا۔

تجزیہ کار نوید اکبر کے مطابق کئی دن صبر کے بعد یہ پہلا موقع ہے کہ پاکستان نے جارحانہ انداز میں پیش قدمی کی ہے۔

ایک غیر مصدقہ ویڈیو میں گجرات میں واقع اڈانی ایئرپورٹ پر شدید تباہی کے مناظر دکھائے گئے ہیں۔