وزیراعظم شہباز شریف سے پاکستان پیپلز پارٹی کے چیئرمین بلاول بھٹو زرداری نے وفد کے ہمراہ ملاقات کی، جس میں آئندہ وفاقی بجٹ سمیت دیگر اہم امور پر تبادلہ خیال کیا گیا۔

وزیراعظم ہاؤس سے جاری اعلامیہ کے مطابق حکومت نے اپنی سب سے بڑی اتحادی جماعت پیپلز پارٹی کے ساتھ آئندہ بجٹ پر باضابطہ مشاورت کا آغاز کر دیا ہے۔ ملاقات میں وزیراعظم شہباز شریف نے کہا کہ حکومت تمام اہم قومی معاملات میں اتحادی جماعتوں سے مشاورت کو ترجیح دیتی ہے۔

پیپلز پارٹی کے وفد نے آئندہ مالی سال کے بجٹ کے حوالے سے تجاویز پیش کیں۔ اعلامیہ کے مطابق یہ بجٹ مشاورت کا پہلا دور تھا، اور مستقبل میں حکومتی کمیٹی کے ساتھ پیپلز پارٹی کی مشاورت جاری رہے گی۔

مالی سال 26-2025 کا بجٹ: حکومت کا آئی ایم ایف سے مشاورت کا فیصلہ

ملاقات کے دوران بجلی کی تقسیم کار کمپنیوں کو دو ماہ کے اندر صوبوں کے حوالے کرنے کا فیصلہ بھی کیا گیا، جسے مرکز سے صوبوں کو اختیارات کی منتقلی کے تناظر میں اہم پیشرفت قرار دیا جا رہا ہے۔