بالی ووڈ کی پلے بیک گلوکارہ کلپنا راگھویندر نے منگل کو نظام پیٹ، حیدرآباد میں اپنی رہائش گاہ پر خودکشی کی کوشش کی۔ وہ اس وقت ہسپتال میں زیرعلاج ہیں۔

بھارتی میڈیا کے مطابق مشہور پلے بیک گلوکارہ کلپنا راگھویندر نے 2 مارچ کو اپنی نظام پیٹ، حیدرآباد کی رہائش گاہ پر خودکشی کی کوشش کی۔

مبینہ طور پر یہ خیال کیا جارہا ہے کہ گلوکارہ نے نیند کی گولیاں کھائی ہیں۔

رپورٹس کا کہنا ہے کہ اطلاعات کے مطابق وہ اپنی رہائش گاہ پر بے ہوش پائی گئیں اور انہیں علاج کے لیے ہسپتال لے جایا گیا۔ گلوکارہ فی الحال خطرے سے باہر ہیں اور وینٹی لیٹر سپورٹ پر ہیں۔

رپورٹس کے مطابق صورتحال اس وقت سامنے آئی جب کلپنا کے دو دن تک دروازہ نہ کھولنے کے بعد اپارٹمنٹ سیکیورٹی نے رہائشیوں کو آگاہ کیا۔ متعلقہ پڑوسیوں نے پولیس سے رابطہ کیا۔ جس کے بعد آگے کی کاروائی عمل میں لائی گئی۔

پولیس اہلکار کے مطابق، ڈاکٹروں کا کہنا ہے کہ انہوں نے نیند کی گولیاں کھائیں، اور ان کے ہوش میں آنے کے بعد مزید معلومات مل سکیں گی۔

گلوکارہ کی خودکشی کی کوشش کی صحیح وجہ ابھی تک واضح نہیں ہو سکی تاہم پولیس تحقیقات کے طور پر گلوکار کے اقدامات کے پیچھے کی وجوہات جاننے کی کوشش کر رہی ہے۔

واقعے کے وقت کلپنا کے شوہرچنئی میں تھے۔ خود کشی کی خبر سن کر وہ حیدرآباد پہنچ گئے۔

کلپنا معروف پلے بیک گلوکار ٹی ایس راگھوندرا کی بیٹی ہیں۔ انہوں نے 2010 میں ”اسٹار سنگر مالایالم“ کا ٹائٹل جیت کر شہرت حاصل کی۔ اپنی اس کامیابی کے بعد انہوں نے کئی نامور موسیقاروں جیسے ایلئیاراجا اور اے آر رحمان کے ساتھ کام کیا۔ موسیقی کے خاندان میں پرورش پانے والی کلپنا نے اپنے گانے کی شروعات صرف پانچ سال کی عمرمیں کی تھی۔

اپنے طویل کیریئر کے دوران، کلپنا نے مختلف زبانوں میں 1,500 سے زائد گانے ریکارڈ کیے ہیں۔ گانے کے علاوہ، انہوں نے فلم ”پناگائی منن“ میں کمال ہاسن کے ساتھ ایک مختصر کیمیو بھی کیا۔

کلپنا نے ”بگ باس تیلگو سیزن 1“ میں بھی حصہ لیا، جس کی میزبانی جونیئر این ٹی آر نے کی تھی۔ ان کے کچھ حالیہ ہٹ گانوں میں اے آر رحمان کے ”مامنن کے کوڈی پرکورا کلم“ اور کیشاوا چندر راماوت کے ”تلنگانہ تیجام“ شامل ہیں۔ اس کے علاوہ، وہ کئی گانے پر مبنی ریئلٹی شوز کی جج بھی رہ چکی ہیں۔