امریکی صدر ڈونلڈ ٹرمپ اور یوکرینی صدر زیلنسکی کے درمیان جھگڑے کے بعد لندن میں 18 یورپی ممالک کا یوکرین کی حمایت میں اجلاس منعقد ہوا جس میں وائٹ ہاؤس میں کشیدگی کے بعد کی صورتحال پر تبادلہ خیال کیا گیا۔

غیر ملکی میڈیا رپورٹس کے مطابق فرانس اور برطانیہ کی جانب سے یوکرین میں ایک ماہ کی جنگ بندی کی تجویز پیش کی گئی۔ اجلاس میں شریک سربراہان نے جب تک جنگ جاری ہے یوکرین کی فوجی مدد جاری رکھنے پر اتفاق کیا۔

اس حوالے سے برطانوی وزیراعظم کیئر اسٹارمر نے کہا برطانیہ، فرانس اور دیگر ممالک یوکرین کے ساتھ جنگ روکنے کے منصوبے پر کام کریں گے، جسے امریکا کے سامنے پیش کریں گے۔

زلینسکی کی ٹرمپ سے تلخ کلامی، یوکرینی صدر نے معافی سے انکار کردیا

برطانوی وزیراعظم کا کہنا تھا کہ یوکرین کی سلامتی میں ہی پورے براعظم یورپ کا استحکام ہے۔ یورپین کمیشن کی صدر نے کہا یورپ کو فوری طور پر دوبارہ مسلح کرنے کی ضرورت ہے۔

ادھر یوکرینی صدر زیلنسکی نے کہا کہ یورپی سربراہ اجلاس کے بعد ہمیں یورپ کی مکمل حمایت حاصل ہے۔ انتہائی اعلی سطح پر یورپی اتحاد طویل عرصے سے نہیں دیکھا گیا۔

ٹرمپ سے جھگڑے کے بعد برطانیہ کا یوکرین کے دفاع کیلئے بڑا اقدام

صدر زیلنسکی نے مزید کہا کہ وہ امریکا کے ساتھ تعلقات کو بچا سکتے ہیں اور مجھے یقین ہے امریکا کے ساتھ ہمارے تعلقات جاری رہیں گے۔

زیلنسکی کا کہنا تھا کہ امریکا کے ساتھ معدنیات کے معاہدے کے لیے تیار ہیں۔ مجھے یقین ہے امریکا بھی معدنیات کے معاہدے کے لیے تیار ہوگا۔