وزیراعظم شہباز شریف نے آپریشن سوئفٹ ریٹارٹ کے 6 برس مکمل ہونے کے موقع پر افواج پاکستان کی جرات و بہادری، پیشہ ورانہ صلاحیتوں اور قربانی کے جذبے کو خراج تحسین پیش کیا اور کہا کہ آپریشن سوئفٹ ریٹارٹ میں پاک فوج نے دشمن کو منہ توڑ جواب دیا، پوری قوم کو افواج پاکستان کے بہادر سپوتوں پر فخر ہے، دشمن سن لے! ہر امتحان میں قوم سیسہ پلائی دیوار کی مانند متحد ہوگی۔

وزیراعظم نے اپنے پیغام میں کہا کہ افواج پاکستان وطن عزیز کی حفاظت کے لیے ہر دم تیار ہیں، افواج پاکستان ملکی سلامتی کے لیے کسی بھی طرح کی جارحیت کے مقابلے کی بھرپور صلاحیت و قابلیت رکھتی ہیں، 27 فروری 2019 کو پاکستان ایئرفورس نے دشمن کو منہ توڑ جواب دیا۔

شہباز شریف نے کہا کہ دشمن کو پیغام دیا اپنی سرحدوں کی حفاظت کرنا جانتے ہیں، پاکستان کی سلامتی کے لیے ہمارے جوان ہر دم تیار ہیں، آپریشن سوئفٹ ریٹارٹ میں دشمن کے مذموم عزائم کو ناکام بنایا گیا، دوران آپریشن ایئرفورس نےعسکری صلاحیتوں کا لوہا منوایا، پاک افواج کسی بھی جارحیت کے مقابلے کی صلاحیت رکھتی ہیں۔

ان کا کہنا تھا کہ پوری قوم کوافواج پاکستان کے بہادر سپوتوں پر فخر ہے، افواج پاکستان وطن عزیز کی حفاظت کے لیے غیرمتزلزل عزم رکھتی ہیں، پاک افواج کی قربانیوں کوقوم کبھی فراموش نہیں کرسکتی، پاکستان علاقائی امن کوفروغ دینے کے لیے ہمیشہ کوشاں ہے، دشمن سن لے! ہر امتحان میں قوم سیسہ پلائی دیوار کی مانند متحد ہوگی۔

آپریشن سوئفٹ ریٹارٹ کو 6 سال مکمل، عسکری قیادت کا مسلح افواج کو خراج تحسین

دوسری جانب پاک فضائیہ کے آپریشن سوئفٹ ریٹارٹ کے 6 برس مکمل ہونے پر چیئرمین جوائنٹ چیفس آف اسٹاف کمیٹی اور تینوں سروس چیفس نے مسلح افواج کی بے مثال ہمت، پیشہ ورانہ مہارت اور قربانیوں کو خراج تحسین پیش کیا۔

پاک فوج کے شعبہ تعلقات عامہ (آئی ایس پی آر) کے مطابق 27 فروری 2019 کو آپریشن سوئفٹ ریٹارٹ، بھارت کی بے جا جارحیت کے جواب میں پاکستان کا پرعزم اور متوازن ردعمل ہے، آپریشن سوئفٹ ریٹارٹ نے پاکستان کی خود مختاری اور علاقائی سالمیت کے تحفظ کے عزم کو اجاگر کیا، اس سے پاکستان مسلح افواج کی آپریشنل تیاری اور مہارت سامنے آئی۔

آئی ایس پی آر کے مطابق آپریشنل سوئفٹ ریٹارٹ سے ثابت ہوا کہ پاکستان کی مسلح افواج جارحیت روکنے اور فوری طور پر ڈیٹرنس دوبارہ قائم کرنے کی صلاحیت رکھتی ہیں، پورے معرکے میں پاکستان کی مسلح افواج نے آپریشنل بالادستی برقرار رکھی۔

چیئرمین جوائنٹ چیفس آف اسٹاف کمیٹی اور سروس چیفس کا پاکستان کی قومی سلامتی اور استحکام کو یقینی بنانے کے عزم کا اعادہ کیا اور علاقائی امن کو فروغ دینے کے لیے مسلسل کوششوں کو جاری رکھنے پر زور دیا۔

عسکری قیادت نے اس عزم کا اظہار کیا کہ مسلح افواج ہمہ وقت چوکس اور کسی بھی خطرے کا مقابلہ کرنے کے لیے مکمل طور پر تیار ہیں، مسلح افواج پاکستانی عوام کے اعتماد پر ہمیشہ پورا اتریں گی۔

ترجمان افواج پاکستان کے مطابق مسلح افواج قوی عزم و ارادے کے ساتھ، ملک کی حفاظت کے لیے تیار ہیں، مسلح افواج علاقائی اور عالمی امن کی کوششوں میں فعال طور پر کردار ادا کر رہی ہیں۔