سوئٹزرلینڈ کے شہر جنیوا کے قریب واقع مشہور اسکی ریزورٹ ٹاؤن کران مونٹانا میں زوردار دھماکا ہوا ہے جس میں کئی افراد کی ہلاکت اور زخمی ہونے کی اطلاعات سامنے آئی ہیں۔

نیو یارک پوسٹ کے مطابق، سوئس پولیس کا کہنا ہے کہ سوئس الپس میں نئے سال کی تقریب کے دوران ایک بار میں لگنے والی آگ کے نتیجے میں درجنوں افراد کے ہلاک ہونے کا خدشہ ہے جبکہ تقریباً 100 افراد زخمی ہوئے ہیں، جن میں سے زیادہ تر کی حالت تشویش ناک بتائی جا رہی ہے۔

جنوب مغربی سوئٹزرلینڈ میں پولیس ترجمان گیٹن لاتھیون نے اے ایف پی کو بتایا کہ واقعے کی تحقیقات کی جا رہی ہیں۔

ترجمان کے مطابق یہ دھماکہ مقامی وقت کے مطابق رات تقریباً ایک بج کر 30 منٹ پر ہوا جہاں لوگ نئے سال کا جشن منا رہے تھے۔

کرانز-مونٹانا ایک لگژری سکی ریزورٹ ٹاؤن ہے جو سوئس الپس کے دل میں واقع ہے، اور سوئس دارالحکومت برن سے تقریبا دو گھنٹے کی دوری پر ہے۔

بی بی سی نے بھی پولیس کے حوالے سے رپورٹ دی ہے کہ واقعے میں متعدد افراد ہلاک اور زخمی ہوئے ہیں۔ اس کے علاوہ متاثرہ افراد کے خاندانوں کے لیے ہیلپ لائن قائم کی گئی ہے۔