فیصل آباد کے حلقہ پی پی 116 میں ضمنی انتخابات کا انعقاد ہوا، جس میں سابق وزیر مملکت اور مسلم لیگ (ن) کے رہنما عابد شیر علی کی بیلٹ پیپر پر مہر لگانے کی ویڈیو وائرل ہوگئی، جس پر ریٹرننگ افسر نے پی پی سابق ایم این اے عابد شیر علی کو ووٹ کی رازداری پامال کرنے پر نوٹس جاری کر دیا۔

عابد شیر علی نے انتخابی قوانین کی خلاف ورزی کی اور موبائل فون پولنگ اسٹیشن میں لے گئے۔ انہوں نے ووٹ ڈالنے کی ویڈیو بنائی اور سوشل میڈیا پر ڈال دی۔

فیصل آباد میں بیلٹ پیپر کی تصویر بنانے والا شخص کو پولیس نے حراست میں لے لیا، مذکورہ شخص نے ووٹ ڈالتے ہوئے ویڈیو بنا کر سوشل میڈیا پر وائرل کی تھی۔ عابد شیر علی یا لیگی کارکن کے خلاف تاحال کوئی کارروائی نہیں ہوسکی۔

ڈسٹرکٹ ریٹرنگ آفیسر کے مطابق بیلٹ پیپر کی رازداری کو پامال کرنا قانونی طور پر جرم ہے۔

عابد شیر علی کو ووٹ کی رازداری پامال کرنے پر نوٹس جاری

دوسری جانب ضمنی انتخابات پی پی 116 فیصل آباد میں سابق ایم این اے عابد شیر علی کو پولنگ اسٹیشن پر ووٹ ڈالتے ہوئے ویڈیو بنانے پر ریٹرننگ افسر کی جانب سے نوٹس جاری کرتے ہوئے وضاحت کے لیے طلب کر لیا گیا ہے۔

ضمنی انتخابات کے دوران پی پی 116 فیصل آباد میں ووٹ کی رازداری کے معاملے پر کارروائی کرتے ہوئے ریٹرننگ افسر نے سابق ایم این اے عابد شیر علی کو نوٹس جاری کیا ہے۔ عابد شیر علی نے اپنے بیلٹ پیپر پر مہر لگاتے ہوئے پولنگ اسٹیشن کے اندر ویڈیو بنائی تھی۔

سامنے آنے والی ویڈیو میں عابد شیر علی کو واضح طور پر بیلٹ پیپر پر مہر لگاتے دیکھا جاسکتا ہے۔ ریٹرننگ افسر کے مطابق ووٹ کی رازداری پامال کرنا اور بیلٹ پیپر کی تصویر یا ویڈیو بنانا قانوناً جرم ہے۔

اسی سلسلے میں ریٹرننگ افسر نے عابد شیر علی کو کل وضاحت پیش کرنے کے لیے طلب کر لیا ہے۔ نمائندہ آج نیوز ناطق ریحان کے مطابق معاملے کا ریکارڈ بھی متعلقہ حکام کے پاس جمع کرا دیا گیا ہے۔

خیال رہے کہ قومی اسمبلی کے 6 اور پنجاب اسمبلی کے 7حلقوں میں ضمنی انتخاب کے لیے آج پولنگ ہوئی ہے۔ ہری پور، لاہور، فیصل آباد، ساہیوال، ڈیرہ غازی خان، سرگودھا، میانوالی اور مظفر گڑھ میں ووٹرز نے حقِ رائے دہی استعمال کیا۔

مظفر گڑھ کے ایک پولنگ اسٹیشن پر بےنظمی کے باعث پولنگ کا عمل کچھ دیر معطل رہنے کے بعد بحال کر دیا گیا۔

جڑانوالا میں این اے 96 اور فیصل آباد کے حلقے پی پی 98 میں انتخابی ضابطۂ اخلاق کی خلاف ورزی کی گئی، ووٹرز کی بیلٹ پیپر پر مہر لگانے کی وڈیوز وائرل ہو گئیں۔

الیکشن کمشنر نے عملے کو ووٹر کو موبائل فون اندر نہ لے جانے اور ووٹ کی رازداری کو یقینی بنانے کی ہدایت کی تھی۔