کراچی کے علاقے اخترکالونی کی عمارت میں لگی آگ پرقابو پالیا گیا۔ دم گھنٹے سے دو خواتین جاں بحق، جبکہ آٹھ افراد کوعمارت سے بحفاظت ریسکیوکرلیا گیا۔

کراچی کے علاقے ڈیفنس فیز ٹو کورنگی روڈ پر واقع ایک ورکشاپ میں شدید آتشزدگی کا واقعہ پیش آیا۔ ریسکیو حکام کے مطابق آگ لگنے سے 13 افراد زخمی ہوئے جن میں سے دو خواتین دوران علاج اسپتال میں دم توڑ گئیں۔

ریسکیو 1122، چھیپا اور ایدھی کے رضا کاروں نے فوری امدادی کارروائیاں کرتے ہوئے زخمیوں کو سول اسپتال اور جناح اسپتال منتقل کیا۔ زخمیوں میں سے تین کو سول اسپتال کے برنس وارڈ اور باقی کو جناح اسپتال میں داخل کیا گیا ہے۔

حادثے کی وجہ سے امدادی کاموں میں مشکلات کا سامنا کرنا پڑا کیونکہ عمارت سے نکلنے کا صرف ایک ہی راستہ تھا۔ فائر فائٹرز نے کھڑکیوں کی گرل توڑ کر آگ بجھانے کی کوشش کی۔ فائر بریگیڈ نے چار گھنٹوں کی جدوجہد کے بعد آگ پر مکمل قابو پایا۔

چیف فائر آفیسر کے مطابق ابتدائی اطلاع ملتے ہی ڈی ایچ اے فائر عملہ موقع پر پہنچا، تاہم آگ کی شدت کے باعث مزید گاڑیاں اور کے ایم سی کی اسنارکل طلب کی گئی۔ آپریشن کے دوران عمارت میں پھنسے آٹھ افراد کو بحفاظت نکال لیا گیا۔

وزیراعلیٰ سندھ نے کمشنر کراچی کو زخمیوں کو فوری طبی امداد فراہم کرنے اور متاثرہ خاندانوں کو ہر ممکن سہولت دینے کی ہدایت کی ہے۔ انہوں نے آتشزدگی کے واقعے کی فوری انکوائری کا بھی حکم دے دیا ہے۔