پاکستان کے مشہور سنگر اداکار اور میوزک کمپوزر علی ظفر نے بالی وُڈ گلوکار سونو نگم اور اداکار رنویر سنگھ کے فن اور لگن کی تعریف کی۔

علی ظفر ایک یوٹیوب شو میں شریک ہوئے جہاں انہوں نے بالی وُڈ کے مقبول گلوکار سونونگم اور اداکار رنویر سنگھ کے بارے میں اپنے خیالات کا اظہار کیا۔

سونو نگم کے بارے میں بات کرتے ہوئے علی ظفر نے کہا کہ وہ ایک غیر معمولی گلوکار ہیں جنہیں موسیقی اور سر کا بھرپور ادراک ہے۔

اُنہوں نے مزید کہا، ’اس مرحلے پر سونو نگم کی آواز بالکل پرفیکٹ ہے۔ لائیو پرفارمنس میں اکثر گلوکاروں کی آواز میں ہلکی سی ٹوٹ پھوٹ آ جاتی ہے اور اچھل کود کی وجہ سے سر ادھر ادھر چلے جاتے ہیں لیکن سونو نگم ایسا فنکار ہے جس کا سر اور تال کبھینہیں ڈگمگاتا۔ یہ اُن کی لگن اور پروفیشنلزم کی سب سے بڑی مثال ہے۔‘

رنویر سنگھ کے حوالے سے علی ظفر نے بتایا کہ دونوں کی دوستی فلم کی شوٹنگ کے دوران ہوئی، کیونکہ سیٹ پر زیادہ وقت ایک ساتھ گزارنے سے قریبی تعلق قائم ہو جاتا ہے۔

اُنہوں نے رنویر کے فن اور توانائی کو بھی سراہا اور کہا کہ، ’رنویر اصل میں شرارتی انسان نہیں، وہ اپنے کردار میں ڈوب جاتے ہیں۔ چونکہ وہ میتھڈ ایکٹر ہیں، اس لیے کردار کی ضرورت کے مطابق خود کو مکمل طور پر ڈھال لیتے ہیں۔ اُن میں بے پناہ انرجی ہے اور وہ بھی اپنے کام کے معاملے میں نہایت سنجیدہ اور پروفیشنل ہیں۔‘

علی ظفر نہ صرف اپنے ہٹ گانوں اور فلمی کرداروں کے باعث عالمی سطح پر جانے جاتے ہیں بلکہ سوشل میڈیا پر بھی اُن کے 6.1 ملین سے زائد مداح موجود ہیں۔ حال ہی میں اُن کے علاقائی گانوں جیسے لیلا او لیلا، بلو بتیاں اور الّے نے شائقین کے دل جیت لیے، جبکہ نعت بلغ العلی بکمالہٖ کی دلکش پیشکش نے بھی بے حد مقبولیت حاصل کی۔

علی ظفر اس وقت اپنی نئی میوزک تخلیقات اور آنے والے فلمی منصوبوں پر توجہ مرکوز کیے ہوئے ہیں اور مداح اُن کے مزید سرپرائزز کے منتظر ہیں۔