ڈی آئی جی کوئٹہ اعتزاز گورایا کا کہنا ہے کہ افغانستان سے لائی گئی دہشت گردوں کی گاڑی تحویل میں لے لی گئی ہے اور متعدد دہشت گرد گرفتار کیے گئے ہیں۔ پریس کانفرنس کے دوران ترجمان بلوچستان حکومت شاہد رند نے بتایا کہ اسسٹنٹ کمشنر تربت کی بازیابی کے لئے اقدامات اٹھائے جا رہے ہیں۔

کوئٹہ میں ڈی آئی جی پولیس کوئٹہ اعتزاز احمد گورایا اور ترجمان بلوچستان حکومت شاہد رند نے مشترکہ پریس کانفرنس کی۔ ڈی آئی جی نے بتایا کہ اغواء میں ملوث مرکزی ملزم طیب شاہ کا تعلق باجوڑ سے ہے، جس کی گرفتاری کے لیے چھاپے مارے جا رہے ہیں۔

انھوں نے بتایا کہ واقعے میں ملوث ہشام نامی شخص کو گرفتار کر لیا گیا ہے جبکہ اغواء میں استعمال ہونے والی گاڑی بھی برآمد کر لی گئی ہے۔ ہشام اس وقت ریمانڈ پر ہے اور واقعے میں شامل دیگر ملزمان کی گرفتاری کے لیے کارروائیاں جاری ہیں۔

ڈی آئی جی اعتزاز گورایا نے کہا کہ مصور خان کی شہادت پر جتنا افسوس کیا جائے کم ہے۔

پریس کانفرنس کے دوران ترجمان بلوچستان حکومت شاہد رند نے کہا کہ قومی شاہراہوں پر مسلح افراد کتنی دیر تک کنٹرول حاصل کر لیتے ہیں، یہ انتہائی سنگین سوال ہے۔ انہوں نے کہا کہ مستونگ اور قلات میں مسلح افراد کی کارروائیوں کے باوجود نقصان نہ ہونا سوالیہ نشان ہے۔

ترجمان نے بتایا کہ ژوب میں بسوں سے مسافروں کو اتار کر قتل کرنے کا دلخراش واقعہ شام کے وقت پیش آیا۔ اس کے علاوہ شعبان سے اغواء کیے گئے 7 افراد کی ہلاکت کی تصدیق سے متعلق سوال پر ترجمان نے کہا کہ ایسی حساس معلومات کی تصدیق ذمہ داری سے کی جاتی ہے۔ اسسٹنٹ کمشنر تربت کی بازیابی کے لیے بھی اقدامات جاری ہیں۔

شاہد رند نے مزید بتایا کہ وزیر اعلیٰ بلوچستان کی زیر صدارت امن و امان کی صورتحال پر اہم اجلاس ہوا، جس میں موجودہ حالات کا جائزہ لیا گیا اور امن و امان کے قیام سے متعلق ہدایات جاری کی گئیں۔