پنجاب اسمبلی میں اپوزیشن لیڈر ملک احمد خان بھچر نے آج نیوز کے پروگرام نیوز انسائیٹ ود عامر ضیاء میں گفتگو کرتے ہوئے ایوان میں پی ٹی آئی ارکان کے خلاف نااہلی ریفرنس کو ذاتی انا اور سیاسی خوشنودی کا نتیجہ قرار دیا۔ ان کا کہنا تھا کہ اسمبلی میں آواز دبانے کی کوشش کی جا رہی ہے اور یہ اقدام پنجاب کی سیاسی تاریخ پر سیاہ دھبہ ہے۔

پاکستان تحریک انصاف کے اپوزیشن لیڈر پنجاب اسمبلی ملک احمد خان بھچر نے آج نیوز کے پروگرام ”نیوز انسائیٹ ود عامر ضیاء“ میں گفتگو کرتے ہوئے پنجاب اسمبلی میں ہونے والے حالیہ واقعات کو جمہوری عمل پر حملہ قرار دیا ہے۔

ان کا کہنا تھا کہ نعرے بازی دونوں طرف سے ہوئی، مگر ہمارے خلاف نااہلی کا ریفرنس ذاتی انا اور کسی کی خوشنودی کا نتیجہ لگتا ہے۔ انہوں نے کہا کہ پنجاب میں اربوں روپے کی تشہیری مہم جاری ہے اور جب ہم وزیراعلیٰ مریم نواز کے خلاف احتجاج کرتے ہیں تو ہمیں سزا دی جاتی ہے۔

ملک احمد بھچر کا کہنا تھا کہ ہم پر مائیک اور کرسیاں توڑنے کا غلط الزام لگا کر 26 ارکان کو معطل کر دیا گیا، حالانکہ ہم پرامن احتجاج کر رہے تھے۔ ان کا کہنا تھا کہ یہ ریفرنس پنجاب کی تاریخ پر سیاہ دھبہ ہے اور یہ روایت کل ان کے لیے بھی نقصان دہ ثابت ہو سکتی ہے جب وہ اپوزیشن میں ہوں گے۔

انہوں نے مزید کہا کہ 26ویں آئینی ترمیم بھی ذاتی مفادات کے لیے کی گئی، ہمیں اپنے بانی قائد سے ملاقات کی اجازت نہیں دی جا رہی، اور اسپیکر کی ناراضگی بھی اندرونی دباؤ کا نتیجہ ہے۔

احمد خان بھچر نے مطالبہ کیا کہ اسپیکر پنجاب اسمبلی ریفرنس واپس لیں، ورنہ ہم احتجاج اسمبلی کے اندر بھی کریں گے اور باہر بھی، ساتھ ہی ساتھ اس غیر آئینی اقدام کے خلاف عدالت سے بھی رجوع کریں گے۔