حجاج کرام کی وطن واپسی کے لیے پوسٹ حج آپریشن 11 جون سے باقاعدہ طور پر شروع ہو گا۔

اسلام آباد انٹرنیشنل ایئرپورٹ کے منیجر آفتاب گیلانی کے مطابق وطن واپسی کی پہلی حج پرواز آج رات 11 جون کی صبح 3 بجے جدہ سے اسلام آباد پہنچے گی، جس میں مختصر دورانیہ کا حج کرنے والے 307 عازمین حج وطن واپس آئیں گے۔

آفتاب گیلانی کا کہنا ہے کہ پوسٹ حج آپریشن 10 جولائی تک جاری رہے گا اور ایک ہفتے بعد مدینہ منورہ سے بھی اسلام آباد کے لیے حجاج کی واپسی کا سلسلہ شروع ہو جائے گا۔

انہوں نے بتایا کہ اس ایک ماہ طویل آپریشن کے دوران 30 ہزار سے زائد حجاج کرام اسلام آباد ایئرپورٹ پر واپس پہنچیں گے۔

ایئرپورٹ منیجر نے یقین دہانی کرائی کہ پوسٹ حج آپریشن کے لیے اسلام آباد انٹرنیشنل ایئرپورٹ پر تمام انتظامات مکمل کر لیے گئے ہیں تاکہ واپسی کے عمل کو سہل اور مؤثر بنایا جا سکے۔