نائب وزیراعظم اسحاق ڈار نے جنگ بندی کی تصدیق کرتے ہوئے کہا کہ پاکستان اور بھارت فوری سیز فائر پر متفق ہو گئے، پاکستان نے ہمیشہ خطے میں امن و سلامتی کی کوشش کی ہے، علاقائی سالمیت، قومی خود مختاری پر سمجھوتا کیے بغیر کوششیں کیں، امریکی صدر ڈونلڈ ٹرمپ نے بھی اپنے بیان میں کہا کہ بھارت اور پاکستان سیز فائر پر تیار ہو گئے ہیں۔ پاکستان اور بھارت نے بھی جنگ بندی پر متفق ہونے کا اعلان کیا۔ دونوں ممالک کے درمیان پاکستانی وقت کے مطابق ساڑھے 4 بجے سے سیز فائر شروع ہو گیا۔
سماجی رابطے کی ویب سائٹ ایکس (سابقہ ٹوئٹر) پر اپنے بیان میں نائب وزیراعظم اسحاق ڈار نے پاکستان اور بھارت کے درمیان جنگ بندی کی تصدیق کرتے ہوئے کہا ہے کہ دونوں ممالک فوری طور پر سیز فائر پر متفق ہو گئے ہیں۔
اسحاق ڈار نے کہا کہ پاکستان نے ہمیشہ خطے میں امن و سلامتی کی کوششیں کی ہیں اور وہ علاقائی سالمیت اور قومی خودمختاری پر کوئی سمجھوتہ کیے بغیر اپنے اقدامات جاری رکھے گا۔
انہوں نے مزید کہا کہ جی ڈی ملیٹری آپریشنز کے حوالے سے بات چیت ہوئی ہے اور پورا دن ڈپلومیسی کے تحت اس معاملے پر کام کیا گیا۔ اسحاق ڈار کے مطابق، پاکستان کی جانب سے امن کی کوششیں جاری رہیں گی۔ ڈی جی ایم اوز بارہ مئی کو مذاکرات کریں گے۔
بھارتی سیکریٹری خارجہ وکرم مسری نے بھی جنگ بندی کی تصدیق کرتے ہوئے کہا کہ ڈی جی ایم اوز بارہ مئی کو مذاکرات کریں گے۔
سعودی عرب کی جانب سے پاک بھارت جنگ بندی کا خیرمقدم کرتے ہوئے سعودی وزیر مملکت برائے خارجہ امور عادل الجبیر نے نائب وزیراعظم اسحاق ڈار کو ٹیلی فون کیا۔ اسحاق ڈار نے سعودی عرب کے مثبت کردار کو سراہا۔
متحدہ عرب امارات کے وزیرخارجہ شیخ عبداللہ بن زید النیہان نے بھی اسحاق ڈار سے رابطہ کیا،شیخ عبداللہ بن زید نے پاک بھارت جنگ بندی کا خیرمقدم کیا۔
مصر کی جانب سے بھی پاک بھارت جنگ بندی کا خیرمقدم کرتے ہوئے وزیر خارجہ ڈاکٹر بدرعبدلطی نے وزیر خارجہ کو ٹیلی فون کیا۔ اسحاق ڈار نے مصری وزیر خارجہ سے علاقائی امن کے لیے پاکستان کے عزم کا اعادہ کیا۔
امریکی صدر ڈونلڈ ٹرمپ نے کہا ہےکہ بھارت اور پاکستان سیز فائر پر تیار ہو گئے ہیں۔
اپنے سوشل میڈیا اکاؤنٹ پر جاری بیان میں امریکی صدر ڈونلڈ ٹرمپ کا کہنا تھا کہ امریکا کی ثالثی میں بھارت اور پاکستان فوری جنگ بندی پر متفق ہوگئے ہیں۔
امریکی صدر کا کہنا تھا کہ بھارت اور پاکستان نے مکمل اور فوری جنگ بندی پر رضامندی ظاہر کردی ہے۔ دونوں ممالک کو مبارک باد دیتے ہوئے ڈونلڈ ٹرمپ کا کہنا تھا کہ پاکستان اوربھارت نے ہوش مندی اور دانشمندی کا مظاہرہ کیا ہے۔
امریکی سیکریٹری خارجہ کا کہنا ہے کہ مجھے یہ اعلان کرتے ہوئے خوشی ہو رہی ہے کہ پاکستان اور بھارت کی حکومتوں نے فوری جنگ بندی پر اتفاق کیا ہے اور ایک غیر جانبدار مقام پر مذاکرات شروع کریں گے۔ ہم شہباز شریف اور مودی کو امن کا راستہ چننے کو سراہتے ہیں۔
مارکو روبیو کا کہنا ہے کہ گزشتہ 48 گھنٹوں کے دوران پاک بھارت کے عہدیداروں، پاکستان کے وزیراعظم شہباز شریف اور بھارتی وزیرِ اعظم نریندر مودی کے ساتھ بات چیت ہوئی۔ اس کے علاوہ، آرمی چیف جنرل عاصم منیر اور قومی سلامتی کے مشیر عاصم ملک سے بھی تفصیلی گفتگو کی۔
دوسری جانب پاکستان کی فضائی حدود کو ہر قسم کی پروازوں کے لیے مکمل طور پر بحال کر دیا گیا ہے۔ تمام ائیر پورٹس معمول کے فلائٹ آپریشن کے لیے دستیاب ہیں۔
خیال رہے کہ بھارت کی جانب سے 6 اور 7 مئی کی رات کو پاکستان اور آزاد کشمیر کے 5 مقامات پر حملے کیے گئے تھے جس کا پاکستانی فورسز نے منہ توڑ جواب دیا اور بھارت کے 5 طیارے بھی مار گرائے۔ پاکستان کی جانب سے بارہا خبردار کرنے کے باوجود بھارت کی جانب سے جارحیت کا سلسلہ جاری رہا اور بھارت نے ڈرون حملوں کے بعد میزائل حملوں سے پاکستانی ائیر بیسز کو نشانہ بنانے کی کوشش کی۔
پاکستان نے آج صبح بھارت کو بھرپور جواب دیتے ہوئے ادھم پور، آدم پور اور پٹھان کوٹ ائیر بیسز سمیت کئی ائیر فیلڈز کو تباہ کر دیا۔ بھارتی ریاست مہاراشٹرا کی الیکٹرک کمپنی پر سائبر حملہ کر کے بجلی کا نظام مکمل طور پر جام کر دیا اور ملٹری سیٹیلائٹ کو بھی جام کر دیا۔
اس کے علاوہ بھارتی وزیر اعظم نریندر مودی کی ریاست گجرات میں پاکستانی ڈرونز کئی گھنٹوں تک پرواز کرتے رہے۔ پاکستان نے بھارت کی بھٹنڈا ائیر فیلڈ کو بھی تباہ کر دیا۔
وزیراعظم شہباز شریف کا کہنا تھا کہ ٓ الحمدللہ افواج پاکستان نے مربوط طریقے سے طاقتور جواب دیا ہے، پہلگام واقعے پرحقائق جاننے کے لیے غیر جانبدارانہ تحقیقات کو بھارت نے ٹھکرا دیا، بھارت نے پاکستان پر میزائل اور ڈرون حملے کیے، ان جارحانہ اقدامات کے باوجود پاکستان نے انتہائی تحمل سے کام لیا۔
بھارت کی جانب سے جاری جارحیت کے جواب میں پاکستان نے ”آپریشن بُنْيَانٌ مَّرْصُوْصٌ“ کے تحت دشمن کو دندان شکن جواب دیا ہے، جبکہ وزیر دفاع خواجہ آصف کا کہنا ہے کہ بھارت کو کاری ضرب لگائی گئی ہے اور کئی ایئر فیلڈز تباہ کر دی گئی ہیں۔
