انٹرنیشنل کرکٹ کونسل (آئی سی سی) نے بنگلادیش کی جانب سے ٹی ٹوئنٹی ورلڈکپ کے بائیکاٹ کے بعد بنگلادیشی صحافیوں کو ایکریڈیشن دینے سے انکار کر دیا ہے۔

بنگلادیشی میڈیا کے مطابق نہ صرف سری لنکا بلکہ بھارت میں بھی کسی بنگلادیشی صحافی کو ایکریڈیشن نہیں دی گئی۔

چیئرمین میڈیا کمیٹی بنگلہ دیش کرکٹ بورڈ (بی سی بی) امزاد حسین نے صحافیوں کو ایکریڈیشن نہ ملنے کی تصدیق کرتے ہوئے بتایا کہ تقریباً 130 سے 150 بنگلادیشی صحافیوں نے ایکریڈیشن کے لیے درخواستیں جمع کرائی تھیں۔

امزاد حسین کے مطابق جہاں تک مجھے معلوم ہے، بنگلہ دیش کے تمام صحافیوں کی ایکریڈیشن مسترد کر دی گئی ہے۔ کئی ایسے صحافی بھی ہیں جن کی ایکریڈیشن پہلے منظور ہو چکی تھی مگر بعد میں مسترد کر دی گئی۔

بنگلادیشی میڈیا کا کہنا ہے کہ آئی سی سی عام طور پر ایسوسی ایٹ ممبرز کے صحافیوں کو بھی ایکریڈیشن دیتی ہے، چاہے ان کی ٹیم ورلڈکپ میں حصہ نہ بھی لے۔

اس صورتحال پر بنگلادیشی اسپورٹس صحافیوں کی تنظیموں نے جلد لائحہ عمل جاری کرنے کا اعلان کیا ہے۔

واضح رہے کہ بنگلہ دیش کی جانب سے بھارت میں ہونے والے ٹی ٹوئٹی ورلڈ کپ کے بائیکاٹ کے بعد بنگلہ دیشی ٹیم کی جگہ اسکاٹ لینڈ کی ٹیم کو شامل کیا گیا ہے۔

میگا ایونٹ میں اسکاٹ لینڈ کو گروپ سی میں انگلینڈ، ویسٹ انڈیز، اٹلی اور نیپال کے ساتھ رکھا گیا ہے۔