سابق گورنراسٹیٹ بینک شمشاد اختر کو کراچی کے میوہ شاہ قبرستان میں والدہ کے پہلو میں سپردِخاک کردیا گیا۔ مرحومہ کی نمازہ جناز سلطان مسجد ڈیفنس میں ادا کی گئی۔ ڈاکٹر شمشاد اختر ہفتے کے روز حرکتِ قلب بند ہونے کے باعث انتقال کر گئی تھیں۔

ڈاکٹر شمشاد اختر کی نمازِ جنازہ میں ڈی جی رینجرزمیجر جنرل محمد شمریز، ڈائریکٹراسٹاک ایکسچنج احمد چنائے، ڈپٹی گورنر اسٹیٹ بینک ڈاکٹرعنایت حسین، مشیرِ خزانہ خیبرپختونخوا مزمل اسلم اور بینکاری اور معاشیات سے وابستہ متعدد اہم شخصیات نے شرکت کی۔

سابق وفاقی وزیرِ خزانہ اور اسٹیٹ بینک آف پاکستان کی سابق گورنر ڈاکٹر شمشاد اختر کے انتقال پر صدرِ مملکت آصف علی زرداری، وزیراعظم شہباز شریف اور چیف آف ڈیفنس فورسز فیلڈ مارشل عاصم منیر نے گہرے دکھ اور افسوس کا اظہار کیا۔ سیاسی و عسکری اعلیٰ قیادت نے مرحومہ کے درجات کی بلندی کی دعا کی اور ملکی و بین الاقوامی سطح پر نمایاں خدمات کو سراہا۔

ڈاکٹر شمشاد اختر کا تعلق حیدرآباد سے تھا اور وہ اسٹیٹ بینک کی پہلی خاتون گورنر تھیں۔

ڈاکٹر شمشاد اختر نے پاکستان میں اقتصادی اور مالیاتی شعبے میں مختلف اہم ذمہ داریاں نبھائیں۔ حکومتِ پاکستان نے ان کی شاندار عوامی خدمات کے اعتراف میں انہیں نشانِ امتیاز سے بھی نوازا۔

وہ اس وقت پاکستان اسٹاک ایکسچینج اور سوئی سدرن گیس کمپنی (ایس ایس جی سی) کی چیئرپرسن کے طور پر خدمات انجام دے رہی تھیں۔ اپریل 2024 میں انہیں دوسری بار تین سال کی مدت کے لیے پاکستان اسٹاک ایکسچینج کے بورڈ آف ڈائریکٹرز کی چیئرپرسن مقرر کیا گیا تھا۔

2007 میں یورومنی کی جانب سے انہیں ایشیا کی بہترین سینٹرل بینک گورنر کا اعزاز ملا۔ انہوں نے 2018 اور 2023 کے نگران دورِ حکومت میں وفاقی وزیر برائے خزانہ اور اقتصادی امور کے طور پر بھی خدمات انجام دیں۔ 2008 میں وال اسٹریٹ جرنل نے انہیں ایشیا کی دس بہترین پیشہ ور خواتین میں شامل کیا۔

اس کے علاوہ ڈاکٹر شمشاد اختر پاکستان انسٹی ٹیوٹ آف کارپوریٹ گورننس کی چیئرپرسن اور پاکستان انوائرمنٹ ٹرسٹ فنڈ کی مشیر کے طور پر بھی فعال کردار ادا کر رہی تھیں۔