خیبر پختونخوا کے ضلع اورکزئی میں سیکیورٹی فورسز نے خفیہ معلومات پر آپریشن کرتے ہوئے بھارتی حمایت یافتہ 19 خوارج کو ہلاک کردیا تاہم فائرنگ کے تبادلے میں لیفٹیننٹ کرنل اور میجر سمیت 11 جوان شہید ہوگئے جب کہ شہید ہونے والے بہادر افسران کی نماز جنازہ ادا کردی گئی ہے۔

پاک فوج کے شعبہ تعلقات عامہ (آئی ایس پی آر) کے مطابق ضلع اورکزئی میں بھارتی حمایت یافتہ دہشت گرد تنظیم ’فتنہ الخوارج‘ کے خلاف خفیہ آپریشن کے دوران شہید ہونے والے 11 بہادر سپوتوں کی نماز جنازہ راولپنڈی کے چکلالہ گیریژن میں ادا کی گئی۔

شہدا میں لیفٹیننٹ کرنل جنید طارق اور میجر طیب راحت بھی شامل ہیں، جن کا تعلق ضلع راولپنڈی سے ہے۔ نمازِ جنازہ میں وزیراعظم شہباز شریف، فیلڈ مارشل سید عاصم منیر، وفاقی وزراء، سینئر عسکری و سول حکام اور عوام کی بڑی تعداد نے شرکت کی۔

اس موقع پر قوم نے شہداء کو شاندار خراجِ عقیدت پیش کیا گیا اور ملک کے دفاع کے لیے ان کی قربانیوں کو سراہا گیا۔

نماز جنازہ کے بعد لیفٹیننٹ کرنل جنید طارق، میجر طیب راحت اور دیگر شہدا کے جسد خالی آبائی علاقوں کو روانہ کردیے گئے جہاں انہیں فوجی اعزازات کے ساتھ سپردِ خاک کیا جائے گا۔

وزیراعظم شہباز شریف نے کہا کہ پاکستانی قوم دہشت گردی کے خلاف متحد اور پرعزم ہے، شہدا کی قربانیاں اس بات کا واضح ثبوت ہیں کہ پاکستانی قوم مادرِ وطن کے دفاع کے لیے کسی قربانی سے دریغ نہیں کرے گی۔

انہوں نے مزید کہا کہ پاک فوج کے بہادر جوانوں کی یہ قربانیاں قوم کے لیے باعثِ فخر ہیں اور ان کے عزم و حوصلے نے ملک دشمن عناصر کے عزائم کو ہمیشہ ناکام بنایا ہے۔

سیکیورٹی فورسز کے آپریشن میں 19 خوارج ہلاک، 11 جوان شہید

واضح رہے کہ سیکیورٹی فورسز نے 7 اور 8 اکتوبر 2025 کی شب ضلع اورکزئی میں خفیہ معلومات کی بنیاد پر ایک آپریشن کیا، جہاں بھارتی سرپرستی میں کام کرنے والے فتنۃ الخوارج کی موجودگی کی اطلاع تھی۔

آپریشن کے دوران سیکیورٹی فورسز کی مؤثر اور بروقت کارروائی سے 19 بھارتی حمایت یافتہ خوارج واصلِ جہنم ہوئے تاہم شدید فائرنگ کے تبادلے میں لیفٹیننٹ کرنل جنید طارق اور ان کے نائب میجر طیب راحت نے جرأت و بہادری سے دشمن کا مقابلہ کرتے ہوئے جامِ شہادت نوش کیا۔

شہادت پانے والے لیفٹیننٹ کرنل جنید طارق راولپنڈی کے رہائشی اور عمر 39 سال تھی جب کہ ان کے نائب میجز طیب راحت بھی راولپنڈی کے رہائشی اور عمر 33 سال تھی جب کہ لیفٹیننٹ کرنل اور میجر کے ساتھ مزید 9 بہادر سپاہی بھی وطن پر قربان ہوگئے۔

شہداء میں نائب صوبیدار اعظم گل (خیبر)، نائیک عادل حسین (کرم)، نائیک گل امیر (ٹانک)، لانس نائیک شیر خان (مردان)، لانس نائیک طالش فراز (مانسہرہ)، لانس نائیک ارشاد حسین (کرم)، سپاہی طفیل خان (ملاکنڈ)، سپاہی عاقب علی (صوابی) اور سپاہی محمد زاہد (ٹانک) شامل ہیں۔

شہید ہونے والے ان بہادر سپاہیوں میں ضلع خیبر کے رہائشی 38 سالہ نائب صوبیدار اعظم گل، ضلع کرم کے رہائشی 35 سالہ نائیک عادل حسین، ضلع ٹانک کے رہائشی 34 سالہ نائیک گل امیر، ضلع مردان کے رہائشی 31 سالہ لانس نائیک شیر خان، ضلع مانسہرہ کے رہائشی 32 سالہ لانس نائیک طالش فراز، ضلع کرم کے رہائشی 32 سالہ لانس نائیک ارشاد حسین، ضلع ملاکنڈ کے رہائشی 28 سالہ سپاہی طفیل خان، ضلع صوابی کے رہائشی 23 سالہ سپاہی عاقب علی اور ضلع ٹانک کے رہائشی 24 سالہ سپاہی محمد زاہد شامل ہیں۔

سیکیورٹی فورسز کی جانب سے علاقے میں کلیئرنس اور سینیٹائزیشن آپریشن جاری ہے تاکہ کسی بھی چھپے ہوئے دہشت گرد کو انجام تک پہنچایا جا سکے۔

آئی ایس پی آر کے مطابق پاکستان کی سیکیورٹی فورسز ملک سے بھارتی اسپانسرڈ دہشت گردی کی لعنت کو ختم کرنے کے لیے پرعزم ہیں اور ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں۔

آئی ایس پی آر نے قوم سے اپیل کی کہ وہ اپنے شہداء کی قربانیوں کو سلام پیش کرے اور دہشت گردی کے خلاف جاری اس قومی جہاد میں اپنی افواج کے ساتھ کھڑی رہے۔

وزیراعظم و وزیر داخلہ کا پیغام

وزیراعظم محمد شہباز شریف نے ضلع اورکزئی میں سیکیورٹی آپریشن میں بھارتی حمایت یافتہ فتنۃ الخوارج کے 19 دہشت گردوں کو جہنم واصل کرنے پر سیکیورٹی فورسز کو خراج تحسین پیش کیا جب کہ لیفٹیننٹ کرنل جنید عارف اور میجر طیب راحت سمیت پاک فوج کے جرات مند سپاہیوں کی شہادت پر اظہار افسوس کیا۔

انہوں نے شہداء کے لیے دعائے مغفرت اور لواحقین کے لیے صبر و استقامت کی دعا کی۔ وزیراعظم کا کہنا تھا کہ سیکیورٹی فورسز کے نڈر سپوتوں کی قربانیاں ہرگز رائیگاں نہیں جائیں گی، بھارتی حمایت یافتہ دہشت گردوں کے مذموم عزائم کو خاک میں ملا دیں گے۔

وزیراعظم شہباز شریف نے کہا کہ پاکستان کی سالمیت کو نقصان پہنچانے والے عناصر کو کامیاب نہیں ہونے دیں گے، حکومت ملک سے دہشت گردی کی عفریت کے مکمل خاتمے کے لیے پر عزم ہیں۔

وفاقی وزیر داخلہ محسن نقوی نے اورکزئی میں 19 بھارتی اسپانسرڈ دہشت گردوں کو جہنم واصل کرنے پر سیکیورٹی فورسز کی ستائش کی۔

انہوں نے دہشت گردوں کے خلاف بہادری سے لڑتے ہوئے جام شہادت نوش کرنے والے لیفٹیننٹ کرنل جنید، میجر طیب اور 9 جوانوں کو خراج عقیدت پیش کیا۔

وزیر داخلہ محسن نقوی نے شہداء کے لواحقین سے دلی ہمدردی و اظہار تعزیت کرتے ہوئے زخمی ہونے والے 2 جوانوں کی صحت یابی کے لیے دعا کی۔

محسن نقوی کا کہنا تھا کہ لیفٹیننٹ کرنل جنید، میجر طیب اور 9 جوانوں نے قیمتی جانیں نچھاور کرکے بھارتی اسپانسرڈ دہشت گردوں کے ناپاک عزائم کو ناکام بنایا۔ شہداء کی عظیم قربانیاں ناقابل فراموش ہیں اور قوم ہمیشہ ان قربانیوں کی مقروض رہے گی۔

وزیر داخلہ کا کہنا تھا کہ شہداء نے اپنے لہو سے وطن سے محبت اور وفا کی تاریخ رقم کی ہے، شہداء کے خون کا ہر قطرہ دہشتگردی کے خلاف ہمارے غیر متزلزل عزم کا عکاس ہے۔ قوم شہداء کے بہادر خاندانوں کو بھی سلام پیش کرتی ہے۔