روس کے صدر ولادیمیر پیوٹن نے کہا ہے کہ فلسطین کے مسئلے کا پُرامن اور قانونی حل خطے میں دیرپا امن کے لیے ضروری ہے۔

کریملن کے مطابق روسی صدر ولادیمیر پیوٹن اور اسرائیلی وزیرِاعظم بن یامین نیتن یاہو کے درمیان مشرق وسطیٰ کی تازہ ترین صورتحال پر تفصیلی بات چیت ہوئی، جس میں خاص طور پر امریکی صدر کی جانب سے پیش کردہ غزہ میں حالات کو معمول پر لانے کے منصوبے پر تبادلہ خیال کیا گیا تھا۔

کریملن کے مطابق صدر پیوٹن نے ایک بار پھر فلسطینی مسئلے کے جامع حل کے لیے بین الاقوامی قانون کی معروف بنیادوں پر روس کے مستقل مؤقف کا اعادہ کیا۔

اس کے علاوہ دونوں رہنماؤں کے درمیان دیگر علاقائی معاملات پر بھی رائے کا تبادلہ ہوا تھا۔ خاص طور پر ایران کے جوہری پروگرام کے گرد پیدا ہونے والی صورتحال کو حل کرنے کے امکانات اور شام میں مزید استحکام کے لیے مذاکرات کے ذریعے راستہ نکالنے پر دلچسپی ظاہر کی گئی۔

پیوٹن اور نیتن یاہو کے درمیان آخری ٹیلیفونک بات چیت اگست میں ہوئی تھی۔