اوپن اے آئی، ٹک ٹاک کی طرز پر ایک نئی خفیہ ایپلی کیشن ’سورا 2‘ لانچ کرنے کی تیاری میں ہے، جس کا مقصد ایک مکمل اے آئی جنریٹڈ ویڈیو فیڈ فراہم کرنا ہے۔ اس ایپلی کیشن کو ٹک ٹاک کا ممکنہ متبادل قرار دیا جا رہا ہے۔رپورٹس کے مطابق یہ ایپ عمودی ویڈیو فیڈ اور ’swipe-to-scroll‘ نیویگیشن پیش کرے گی۔

رائٹرز اور وال اسٹریٹ جرنل کی رپورٹس کے مطابق اس ایپ میں صارفین اوپن اے آئی کے Sora جنریٹر کے ذریعے 10 سیکنڈ تک کی ویڈیوز بنا سکیں گے۔ تاہم، صارفین اپنی کیمرہ رول یا دیگر ایپس سے ویڈیوز یا تصاویر اپ لوڈ نہیں کر سکیں گے، کیونکہ تمام مواد مکمل طور پر اے آئی کے ذریعے تیار کیا جائے گا۔

ایک اہم فیچر شناخت کی تصدیق (identity verification) ہے، جس سے صارف اپنے چہرے کی تصدیق کر سکیں گے۔ تصدیق شدہ صارف اپنی شکل کو ویڈیوز میں استعمال کر سکیں گے، اور دیگر صارفین بھی ان کی اجازت سے یہ شکل اپنی ویڈیوز میں شامل کر سکتے ہیں۔ اس کے علاوہ، صارفین کو اپنے فیس کے استعمال کی اطلاع موصول ہوگی، چاہے ویڈیو ڈرافٹ میں محفوظ کیا جائے یا پوسٹ نہ کیا جائے۔

رپورٹس میں بتایا گیا ہے کہ اوپن اے آئی نے اس ایپ کو پچھلے ہفتے اندرونی طور پر لانچ کیا تھا اور ملازمین کی جانب سے مثبت فیڈبیک موصول ہوا۔ تاہم، کمپنی نے اس وقت اس خبر کی سرکاری تصدیق یا تبصرہ جاری نہیں کیا ہے۔

ایک اور اہم پہلو یہ ہے کہ کاپی رائٹ شدہ مواد کو شامل کرنے کے لیے ایک ’opt-out‘ طریقہ کار ہوگا۔ اس کا مطلب یہ ہے کہ مواد کے مالک کو واضح طور پر درخواست دینی ہوگی کہ وہ اپنی تخلیقات کو اے آئی ویڈیوز میں شامل نہ کرنے کی اجازت نہ دیں۔ البتہ، مشہور عوامی شخصیات کی تصاویر ان کی اجازت کے بغیر تیار نہیں کی جائیں گی۔

یہ منصوبہ اگر عملی شکل اختیار کر لیتا ہے تو یہ سوشل میڈیا کے ماحول میں ایک نیا تجربہ ثابت ہو سکتا ہے، لیکن اس کے ساتھ صارف کی پرائیویسی، کاپی رائٹ اور شناخت کے تحفظ جیسے اہم مسائل بھی سامنے آئیں گے۔