پاک فوج کے ترجمان لیفٹیننٹ جنرل احمد شریف چوہدری نے کہا ہے کہ آزاد کشمیر میں سیاسی سسٹم کام کررہا ہے اور اگر ریاست ٹیکس نہیں لے گی تو مراعات اور تنخواہیں کیسے ادا کی جائیں گی، آزاد کشمیر میں لوگوں کو احتجاج کا حق ہے مگر انتشار سے معیشت کو نقصان ہوتا ہے۔

پیر کو ڈی جی آئی ایس پی آر لیفٹیننٹ جنرل احمد شریف چوہدری کا آزاد کشمیر کی مختلف جامعات کے طلبہ سے پلندری میں خطاب سوشل میڈیا پر وائرل ہوگیا۔

ترجمان پاک فوج نے 15 ستمبر کو آزاد کشمیر کے علاقے پلندری میں مختلف جامعات کے ایک ہزار سے زائد طلبا اور اساتذہ کے سوالات کا جواب دیا جب کہ سوال و جواب کے چند حصوں کی ویڈیو سوشل میڈیا پر وائرل ہوگئی۔

عوامی ایکشن کمیٹی کی توڑ پھوڑ کی سیاست پر سوال کے جواب میں ڈی جی آئی ایس پی آر نے کہا کہ آزاد کشمیر میں سیاسی سسٹم ہے جو کام کر رہا ہے، آزاد کشمیر میں تمام اشاریے بشمول تعلیم ، صحت اور انفراسٹرکچر بہت بہتر ہیں۔

لیفٹیننٹ جنرل احمد شریف چوہدری نے کہا کہ اگر ریاست ٹیکس نہیں لے گی تو مراعات اور تنخواہیں کیسے دے گی، 30 فیصد سے زائد آزاد کشمیر کے لوگ سرکاری نوکری کرتے ہیں، احتجاج سب کا حق ہے مگر انتشار سے معیشت کو نقصان ہوتا ہے، اللہ تعالیٰ نے کشمیر کو بے پناہ نعمتوں سے نوازا ہے۔

ترجمان پاک فوج نے مزید کہا کہ پاکستان کا خواب دیکھنے والے کا تعلق بھی کشمیر سے تھا، فوج میں متعدد آفیسرز اور جوان کشمیری ہیں، کشمیر کا مستقبل ”کشمیر بنے کا پاکستان“ ہے۔