پاکستان کے 78ویں یوم آزادی کے موقع پر ایوان صدر میں شاندار تقریب کا انعقاد کیا گیا، جس میں نمایاں قومی خدمات انجام دینے والی سول و عسکری شخصیات کو مختلف اعزازات سے نوازا گیا۔

تقریب میں صدر مملکت، وزیر اعظم شہباز شریف، فیلڈ مارشل سید عاصم منیر، چیئرمین سینیٹ، اسپیکر قومی اسمبلی، بلاول بھٹو زرداری، آصفہ بھٹو زرداری اور دیگر اعلیٰ شخصیات شریک ہوئیں۔

نائب وزیر اعظم اسحاق ڈار، وزیر دفاع خواجہ آصف، وزیر قانون اعظم نذیر تارڑ، وزیر اطلاعات عطا تارڑ، وزیر داخلہ محسن نقوی، وزیر منصوبہ بندی احسن اقبال، بلاول بھٹو زرداری اور رانا ثنا اللہ کو نشان امتیاز عطا کیا گیا۔

اسحاق ڈار کو یہ اعزاز سفارتی سطح پر پاکستان کا مؤقف مؤثر انداز میں پیش کرنے پر دیا گیا، جبکہ بلاول بھٹو کو بھی سفارتی محاذ پر کارکردگی کے اعتراف میں اعزاز ملا۔

آپریشن بنیان المرصوص میں بہادری اور قربانی پر افواج پاکستان کو اعزازات

فیلڈ مارشل عاصم منیر اور ایئر چیف مارشل ظہیر احمد بابر کو ہلال جرات جبکہ چیئرمین جوائنٹ چیفس جنرل ساحر شمشاد مرزا اور نیول چیف ایڈمرل نوید اشرف کو نشان امتیاز سے نوازا گیا۔

آئی ایس پی آر کے جاری کردہ بیان کے مطابق، صدرِ پاکستان کی جانب سے ”بنیان المرصوص“ آپریشن میں بہادری اور قربانی پر افواجِ پاکستان کو فوجی اعزازات سے نوازا گیا۔ اس موقع پر 8 ستارۂ جُرأت، 5 تمغۂ جُرأت، 24 ستارۂ بسالت، اور 45 تمغۂ بسالت عطا کیے گئے۔

146 امتیازی اسناد، 259 چیف آف آرمی اسٹاف کمانڈیشن کارڈز اور1 تمغۂ امتیاز (ملٹری) بھی دیے گئے۔ ستارۂ جُرأت حاصل کرنے والے تمام افسران کا تعلق پاک فضائیہ سے ہے، جن میں ونگ کمانڈر بلال رضا، ونگ کمانڈر حماد ابن مسعود، اسکواڈرن لیڈر محمد یوسف خان، اسکواڈرن لیڈر محمد اسامہ اشفاق، اسکواڈرن لیڈر محمد حسن انیس، اسکواڈرن لیڈر طلال حسن، اسکواڈرن لیڈر فدا محمد خان اور فلائٹ لیفٹیننٹ محمد اشہاد امیر شامل ہیں۔

آئی ایس پی آر کے مطابق تمغۂ جرات کے اعزاز سے شہداء اور حاضر سروس افسران کو نوازا گیا، جن میں ایل/ حوالدار عامر شیراز شہید، نائیک عبد الرحمن شہید، ایل/نائیک اکرام اللہ شہید، صوبیدار عادل اکبر شہید اور کیپٹن علی حسن شامل ہیں۔

ستارۂ بسالت 24 افسران و جوانوں کو عطا کیا گیا جن میں پاک فوج، پاک بحریہ اور پاک فضائیہ کے سینیئر افسران شامل ہیں، جن میں لیفٹیننٹ جنرل محمد عاصم ملک، لیفٹیننٹ جنرل نعمان زکریا، لیفٹیننٹ جنرل سید عامر رضا، وائس ایڈمرل راجہ رب نواز، ریئر ایڈمرل عبدالمُنّیب اور ایئر وائس مارشل محمد احسان الحق شامل ہیں۔

تمغۂ بسالت 45 شہدا اور حاضر سروس افسران و جوانوں کو دیا گیا، جن میں ایئر کموڈورعدیل شہاب قریشی، ونگ کمانڈر وجیہ اللہ میاں، اسکواڈرن لیڈر جبران رشید اور دیگر شامل ہیں، 146 افسران و جوانوں کو امتیازی اسناد دی گئیں، جن میں میجر جنرل محمد عرفان، میجرجنرل عارف اجمل، بریگیڈیئر سجاد سرور سمیت دیگر شامل ہیں۔

آئی ایس پی آر کے مطابق سی او اے ایس کمنڈیشن کارڈ 259 افسران و جوانوں کو عطا کیے گئے، جن میں میجر جنرل رانا عرفان شکیل ، بریگیڈیئرطارق خان، کرنل عثمان خالد اور دیگر شامل ہیں، جبکہ تمغۂ امتیاز (ملٹری) پاک بحریہ کے لیفٹیننٹ کمانڈر خرم ریاض کو دیا گیا، آئی ایس پی آر کا کہنا ہے کہ یہ اعزازات اس عزم کی علامت ہیں کہ پاکستان کی مسلح افواج اپنے وطن کے دفاع اور عوام کی سلامتی کے لیے ہر قربانی دینے کوتیارہیں۔

وزیر اعظم کے تشکیل کردہ سفارتی وفد کو بھی اعزازات دیے گئے۔ سینیٹر شیری رحمان، فیصل سبزواری، حنا ربانی کھر، خرم دستگیر خان، بشریٰ انجم، عمر فاروق، جلیل عباس جیلانی، مصدق ملک اور طارق فاطمی کو ہلال امتیاز ملا۔

ایوان صدر میں منعقدہ اس پروقار تقریب میں شرکاء نے قومی پرچم کی سربلندی اور ملک کی خدمت کے عزم کا اعادہ کیا۔