قومی ایئر لائن پی آئی اے جدہ ائیرپورٹ پرمسافروں کا سامان چھوڑ آئی، پی آئی اے کی پرواز پی کے 832 کے مسافراسلام آباد ایئرپورٹ پرسامان کیلئے پریشان ہوتے رہے۔

اسلام آباد ایئرپورٹ پر قومی ایئرلائن پی آئی اے کی پرواز PK-842 سے جدہ سے آنے والے مسافروں کو شدید مشکلات کا سامنا کرنا پڑا۔ مسافر دو گھنٹے سے زائد وقت تک کنویئر بیلٹ کے گرد اپنے سامان کے انتظار میں کھڑے رہے۔ سامان نہ ملنے پر مسافروں نے احتجاج بھی کیا اور ایئرپورٹ پر موجود عملے سے شکایت کی، مگر واضح جواب نہ مل سکا۔

پی آئی اے کی پرواز مسافروں کا سامان مدینہ منورہ میں چھوڑ آئی

مسافروں نے الزام عائد کیا کہ نہ تو بروقت کوئی اطلاع دی گئی اور نہ ہی ایئرپورٹ پر کوئی مؤثر سہولت میسر آئی۔ بعض مسافروں نے شدید غصے کا اظہار کرتے ہوئے اعلیٰ حکام سے نوٹس لینے کا مطالبہ کیا۔

ترجمان پی آئی اے اور ترجمان پاکستان ایئرپورٹس اتھارٹی سے رابطہ کیا گیا تو پی آئی اے کے ترجمان نے تصدیق کی کہ پرواز PK-842 کے سامان کی ترسیل میں تاخیر آپریشنل وجوہات کی بنا پر ہوئی۔

ترجمان پی آئی اے کے مطابق، جدہ سے اسلام آباد کی اس پرواز کے لیے طے شدہ بوئنگ 777 کی جگہ ایئربس A320 طیارہ آخری لمحات میں آپریٹ کیا گیا، جس میں سامان کی گنجائش محدود ہوتی ہے۔ اسی بنا پر متعدد مسافروں کا سامان جدہ ایئرپورٹ پر ہی رہ گیا۔

کسٹم کی کراچی ایئرپورٹ پر کارروائی، منشیات کی بڑی اسمگلنگ ناکام بنادی

ترجمان نے بتایا کہ سامان کو مختلف پروازوں کے ذریعے 24 سے 36 گھنٹوں کے اندر اسلام آباد پہنچانے کے لیے فوری اقدامات کیے جا رہے ہیں۔

ترجمان پی آئی اے نے متاثرہ مسافروں سے پیش آنے والی تکلیف پر دلی معذرت کا اظہار کیا اور یقین دہانی کروائی کہ جلد ہی تمام سامان ان کے حوالے کر دیا جائے گا۔