وزیراعظم شہباز شریف نے چینی کی قیمتوں کے حوالے سے اجلاس میں واضح ہدایت دی ہے کہ معاہدے کی خلاف ورزی کر کے زائد قیمتیں وصول کرنے والوں کے خلاف سخت کارروائی کی جائے۔

وزیراعظم شہباز شریف نے بدھ کے روز چینی کی قیمتوں کے حوالے سے ایک اعلیٰ سطحی اجلاس کی صدارت کرتے ہوئے خبردار کیا ہے کہ چینی کی مقررہ قیمتوں کی خلاف ورزی کرنے والوں کے خلاف سخت کارروائی کی جائے گی۔ انہوں نے واضح کیا کہ عوام کا معاشی استحصال کسی صورت برداشت نہیں کیا جائے گا۔

اجلاس میں ملک بھر میں چینی کی قیمتوں اور دستیابی سے متعلق معاملات کا جائزہ لیا گیا، جس میں حکومت کے اس عزم کا اعادہ کیا گیا کہ عوام کو ریلیف فراہم کرنے کے لیے منصفانہ قیمتیں یقینی بنائی جائیں گی۔

حکومت اور شوگر مالکان میں معاملات طے، چینی کی ایکس مل کی قیمت 165 روپے کلو مقرر

وزیراعظم نے پاکستان شوگر ملز ایسوسی ایشن اور حکومت کے درمیان طے پانے والے معاہدے پر سختی سے عمل درآمد کی ہدایت دی۔ معاہدے کے مطابق چینی کی ایکس مل قیمت 165 روپے فی کلو مقرر کی گئی ہے، جبکہ ریٹیل قیمت 173 روپے فی کلو سے زائد نہیں ہو سکتی۔

چینی بحران شدت اختیار کرگیا، شوگر ملز مالکان اور ڈیلرز کے درمیان تنازعہ تاحال حل نہیں ہو سکا

اجلاس میں متعلقہ حکام نے وزیراعظم کو چینی کی مصنوعی قلت پیدا کرنے والوں کے خلاف جاری کارروائیوں سے بھی آگاہ کیا۔ حکومت نے ذخیرہ اندوزوں اور منڈی میں قیمتوں کے ساتھ چھیڑ چھاڑ کرنے والوں کے خلاف کریک ڈاؤن جاری رکھنے کے عزم کا اعادہ کیا۔

وزیراعظم نے اس بات پر زور دیا کہ انتظامیہ اشیائے ضروریہ خصوصاً چینی کی سپلائی میں رکاوٹ یا قیمتوں میں مصنوعی اضافے کی کسی بھی کوشش کو ہرگز برداشت نہیں کرے گی۔