بھارت نے پاکستان کے خلاف ورلڈ چیمپئن شپ آف لیجنڈ کا سیمی فائنل کھیلنے سے انکار کر دیا، بھارتی میڈیا کے مطابق کل برمنگھم میں پاکستانی چیمپئنز کا بھارتی ٹیم سے ٹاکرا طے تھا۔ انتظامیہ کے مطابق بھارت کے نہ کھیلنے کی صورت میں پاکستان فائنل میں پہنچ جائے گا۔

بھارت نے ایک بار پھر کھیل کو سیاست کی نذر کرتے ہوئے ورلڈ چیمپئن شپ آف لیجنڈز 2025 کے سیمی فائنل میں پاکستان کے خلاف میدان میں اترنے سے انکار کردیا ہے۔ پاکستان چیمپئنز کے ٹیم ذرائع نے تصدیق کی بھارت کے سیمی فائنل کھیلنے سے انکار پر پاکستان فائنل میں پہنچ گیا۔

بھارتی ٹیم کی جانب سے یہ قدم دو طرفہ تعلقات میں کشیدگی اور حالیہ ایشیا کپ شیڈول پر بھارت میں ہونے والے سیاسی شور و غل کے بعد اٹھایا گیا ہے۔ بھارتی میڈیا کے مطابق بھارت چیمپئنز کی ٹیم جس میں یووراج سنگھ، شیکھر دھون، یوسف پٹھان اور دیگر سابق کھلاڑی شامل ہیں، پہلے ہی گروپ مرحلے میں پاکستان کے خلاف میچ کا بائیکاٹ کر چکی تھی۔

ادھر، ایونٹ انتظامیہ نے بھارتیوں کو شٹ اپ کال دیتے ہوئے کہا کہ مقابلہ کرو، ورنہ پاکستان فائنل میں جائے گا۔ ذرائع کے مطابق ایونٹ انتظامیہ نے پاکستان کو واک اوور دے دیا، دوسرا سیمی فائنل کل جنوبی افریقا اور آسٹریلیا کے درمیان ہوگا۔ فاتح ٹیم ہفتے کو فائنل میں پاکستان کا سامنا کرے گی۔

بھارتی ٹیم نے اپنی جگہ ویسٹ انڈیز کو شکست دے کر بنائی تھی، لیکن اب اہم مقابلے سے پیچھے ہٹنے کا فیصلہ کر کے نہ صرف کھیل کے جذبے کی نفی کی ہے بلکہ عالمی سطح پر ایک منفی تاثر بھی چھوڑا ہے۔

دوسری جانب بھارتی اسپانسر ایزی مائی ٹرپ نے بھی پاکستان سے متعلق تعصب کا مظاہرہ کرتے ہوئے سیمی فائنل سے خود کو علیحدہ کر لیا ہے اور ایک متعصب بیان جاری کرتے ہوئے کہا ہے کہ وہ پاکستان کے خلاف کسی بھی میچ کا حصہ نہیں بن سکتے۔

تجزیہ نگاروں کا کہنا ہے کہ بھارت کی جانب سے کھیل کو بار بار سیاست کا نشانہ بنانا نہ صرف کرکٹ کے عالمی اصولوں کی خلاف ورزی ہے بلکہ کھیلوں کے ذریعے تعلقات بہتر بنانے کے امکانات کو بھی سبوتاژ کرتا ہے۔