پاکستان سمیت دنیا بھر میں آج ہیپاٹائٹس کا عالمی دن منایا جا رہا ہے جس موقع پر وزیراعظم شہباز شریف نے اعلان کیا کہ 2030 تک ایک کروڑ 65 لاکھ افراد کی اسکریننگ ہوگی، مثبت کیسز کا حکومت کی جانب سے مفت علاج کیا جائے گا۔

ہیپاٹائٹس کے عالمی دن کے موقع پر صدر مملکت آصف علی زرداری اور وزیراعظم شہباز شریف کی جانب سے پیغام دیا گیا ہے۔

صدر مملکت نے کہا ہے پاکستان میں ہیپاٹائٹس صحت عامہ کا ایک سنگین مسئلہ ہے، ہیپاٹائٹس جیسے خطرناک مرض سے متعلق شعور اجاگر کیا جائے۔

صدر آصف علی زراری نے پیغام میں کہا کہ لاکھوں افراد بروقت تشخیص نہ ہونے سے مرض کا شکار ہو رہے ہیں، ہیپاٹائٹس کو بجا طور پر’’خاموش قاتل‘’ کہا جاتا ہے۔

صدر مملکت کا کہنا ہے کہ ہیپاٹائٹس کا مرض ایسی اسٹیج پر ظاہر ہوتا ہے جب جگر کو نقصان پہنچ چکا ہوتا ہے، اس بیماری کے خلاف منظم قومی حکمت عملی کی ضرورت ہے۔

صدر آصف زراری کا مزید کہنا تھا کہ بروقت اسکریننگ اور علاج تک رسائی کو یقینی بنانا ہوگا، طبی طریقہ کار کے سخت ضوابط پر عملدرآمد لازمی ہے، عوامی شعور کو ہماری کوششوں کا مرکز ہونا چاہئے جس سے اس چیلنج پر قابو پاسکتے ہیں۔

وزیراعظم شہباز شریف پیغام

وزیراعظم شہباز شریف نے ہیپاٹائٹس سے بچاؤ کے عالمی دن کے موقع پر کہا کہ یہ مرض ایک عالمی چیلنچ بن چکا ہے۔

وزیراعظم کا کہنا ہے کہ ہیپاٹائٹس کی شرح والے ممالک میں پاکستان بھی شامل ہے، بہت سے متاثرہ افراد تشخیص اور علاج کے بغیر رہ جاتے ہیں۔

وزیراعظم شہباز شریف نے پیغام میں کہا کہ حکومت نے ہیپاٹائٹس سی خاتمے کے لئے قومی پروگرام شروع کیا ہے۔

شہباز شریف نے اعلان کیا کہ 2030 تک ایک کروڑ 65 لاکھ افراد کی اسکریننگ ہوگی، مثبت کیسز کا حکومت کی جانب سے مفت علاج کیا جائے گا۔

شہباز شریف کا مزید کہنا ہے کہ آگاہی، بروقت تشخیص،علاج بیماری پر قابو پانے کا واحد راستہ ہے۔

وزیر اعلیٰ پنجاب مریم نواز کا پیغام

وزیر اعلیٰ پنجاب مریم نواز نے ورلڈ ہیپاٹائٹس ڈے پرپیغام میں کہا کہ ہیپاٹائٹس خاموش قاتل ہے، یہ آہستہ آہستہ جگر کو متاثر کرتا ہے اور بروقت تشخیص و علاج نہ ہونے پر جان لیوا ہو سکتا ہے۔

وزیر اعلیٰ پنجاب نے کہا کہ ہیپاٹائٹس کی ویکسین کی فراہمی کو یقینی بنایا جا رہا ہے۔ ہیپاٹائٹس ٹیسٹ کی مفت سہولیات فیلڈ ہسپتالوں اور کلینک آن پر بھی دستیاب ہیں اور مریضوں کو مفت ادویات گھروں تک پہنچائی جا رہی ہیں۔

وزیر اعلیٰ پنجاب کا کہنا تھا کہ ہیپاٹائٹس سے متعلق آگاہی مہم کے ذریعے عوام میں شعور بیدار کیا جا رہا ہے۔ صحت مند پنجاب ہی ترقی یافتہ پنجاب ہے۔ ان کا کہنا تھا کہ عوام سے اپیل ہے کہ وہ ہیپاٹائٹس کا ٹیسٹ ضرور کروائیں، ویکسین لگوائیں اور یہ پیغام دوسروں تک پہنچائیں۔احتیاط اور علاج سے ہیپاٹائٹس سے مکمل بچاؤ ممکن ہے۔