بھارتی کرکٹ بورڈ کا کہنا ہے کہ پاکستان کے خلاف میچ سے دستبردار نہیں ہوسکتے، ایشیا کپ میں پاکستان سے میچ شیڈول کے مطابق ہوگا، اے سی سی اجلاس میں سب طے ہوچکا ہے، حکومتی گرین سگنل کے بعد ہی شیڈول جاری ہوا، اس مرحلے پر کچھ تبدیل نہیں ہوسکتا۔

بھارتی کرکٹ بورڈ (بی سی سی آئی) نے واضح کر دیا ہے کہ ایشیا کپ میں پاکستان کے خلاف میچ شیڈول کے مطابق ہی کھیلا جائے گا اور کسی قسم کی دستبرداری کا سوال ہی پیدا نہیں ہوتا۔

بھارتی میڈیا کے مطابق، بورڈ کا مؤقف ہے کہ ایشین کرکٹ کونسل (اے سی سی) کے حالیہ اجلاس میں تمام معاملات طے پا چکے ہیں۔

بی سی سی آئی حکام نے تصدیق کی ہے کہ حکومتی گرین سگنل کے بعد ہی ایشیا کپ کا شیڈول جاری کیا گیا، اس لیے اب اس مرحلے پر کسی بھی تبدیلی کا امکان نہیں ہے۔

ذرائع کے مطابق، اس حوالے سے اعلیٰ سطح کا اجلاس بھی ہوا جس میں صورتحال کا تفصیلی جائزہ لینے کے بعد یہ فیصلہ برقرار رکھنے کا فیصلہ کیا گیا۔

بھارتی کرکٹ بورڈ کے مطابق، کھیل کو سیاست سے الگ رکھنا چاہیئے اور دونوں ممالک کے درمیان کرکٹ مقابلے خطے میں کرکٹ کی ترقی کے لیے اہم ہیں۔

ایشیا کپ میں روایتی حریف پاکستان اور بھارت کے درمیان مقابلے کو دنیا بھر کے شائقین بے چینی سے دیکھ رہے ہیں، اور اس تازہ پیشرفت کے بعد یہ میچ مقررہ وقت پر ہونے کا امکان مزید مضبوط ہو گیا ہے۔

خیال رہے کہ ایشیا کپ کے شیڈول کا اعلان گزشتہ روز کیا گیا تھا۔ ایونٹ میں پاکستان اور بھارت کم از کم دو اور زیادہ سے زیادہ تین بار آمنے سامنے آسکتے ہیں۔ ایشیا کپ 9 ستمبر سے شروع ہو گا جبکہ پاک بھارت پہلا گروپ میچ 14 ستمبر کو ہوگا۔