اسلام آباد کے راول ڈیم کے اسپل ویز کل صبح 6 بجے کھولنے کا فیصلہ کرلیا گیا، انتظامیہ کے مطابق حالیہ بارش کے باعث ڈیم میں پانی کی سطح 1750.50 فٹ ہوگئی جبکہ متعلقہ اداروں کو الرٹ رہنے کی ہدایت کردی گئی۔

تفصیلات کے مطابق اسلام آباد کے راول ڈیم میں حالیہ بارشوں کے باعث پانی کی سطح بلند ہوگئی، جس کے باعث ڈیم میں پانی کی سطح 1750.50 فٹ تک پہنچنے پر اسپل ویز کو کل صبح 6 بجے کھولا جائے گا۔

اسسٹنٹ کمشنر نیلور کی جانب سے اسپل ویز کھولنے کے عمل کی نگرانی کی جائے گی، ریسکیو، سیکیورٹی اور میڈیکل ٹیمیں فوری امدادی کارروائی کے لیے مختلف مقامات پر موجود رہیں گی۔

ضلعی انتظامیہ کی جانب سے متعلقہ اداروں کو الرٹ رہنے اور تمام ضروری اقدامات بروقت مکمل کرنے کی ہدایت کی گئی ہے جبکہ شہریوں کو راول ڈیم کے قریب غیر ضروری سرگرمیوں سے اجتناب کا کہا گیا ہے۔